ԵՐԵՎԱՆ, 27 հունվարի. /Նովոստի–Արմենիա/. Հայաստանի պաշտպանության նախարար Վիգեն Սարգսյանն ուրբաթ լրագրողներին պատմել է իր երազանքի մասին։
«Ես պաշտպանության նախարարի աշխատանքն այս երկրում համարում եմ ամենակարևորներից, հետաքրքիրներից և պատասխանատուներից մեկը։ Մի երազանք ունեմ` որ առաջիկա (խորհրդարանական) ընտրություններում մենք կարողանանք այնպիսի արդյունք ապահովել, որը թույլ կտա առաջիկա տարիներին ինձ աշխատել Պաշտպանության նախարարությունում»,– ասաց Սարգսյանը` պատասխանելով այն հարցին, թե հնարավոր է, արդյո՞ք, նրա նշանակումը վարչապետի պաշտոնում 2018 թվականին։
Նա նշեց, որ շատ անելիք ունի, հույս հայտնելով, որ ժամանակ կունենա դա իրագործելու համար։
«Խորապես համոզված եմ, որ այսօր այստեղ պետք է երկար տարիների աշխատանք ծրագրել և չի կարելի շտապ ծրագրեր կազմել։ Դա անազնիվ կլիներ համակարգի նկատմամբ։ Հուսով եմ, որ, եթե ընտրությունների արդյունքներն այնպիսին լինեն, ինչպիսին մենք ծրագրում ենք, ապա նախագահ Սերժ Սարգսյանը թույլ կտա ինձ շարունակել իմ գործառույթներն այստեղ»,– ասաց Սարգսյանը։
Հայաստանի խորհրդարանական հերթական ընտրությունները կանցկացվեն 2017 թվականի ապրիլի 2–ին, սակայն նախօրեին Ազգային ժողովի փոխխոսնակ Շարմազանովը չի բացառել ընտրությունների ամսաթվի փոփոխության հավանականությունը։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում