ԵՐԵՎԱՆ, 5 մայիսի. /Նովոստի-Արմենիա/. Անկարայի քաղաքականությունը Հայաստանի նկատմամբ չի փոխվի Թուրքիայի գործող վարչապետ Ահմեդ Դավութօղլու հրաժարականի դեպքում, կարծում է թուրքագետ Հակոբ Չաքրյանը:
«Դա (քաղաքականության փոփոխումը) հնարավոր է միայն այն պարագայում, երբ Թուրքիան հրաժարվի Ադրբեջանում իր դիրքերի ամրապնդումից, ինչպես նաև Մեղրիի միջանցքն Ադրբեջանին միացնելու մտադրությունից», - հինգշաբթի մամուլի ասուլիսի ժամանակ նշեց Չաքրյանը։
Թուրքագետի կարծիքով, թուրքական կողմը Հայաստանի հետ հարաբերությունները պետական քաղաքականության շրջանակում ազգային խնդիր է համարում, որի վրա երկրի կառավարությունը չի կարող ազդել:
Ինչպես նշեց Չաքրյանը, հինգշաբթի Դավութօղլուն «Արդարություն և զարգացում» կուսակցության կենտրոնական վարչության նիստ կհրավիրի (որի նախագահն ինքն է) և կհայտարարի մայիսի 28-ին արտահերթ նիստի անցկացման մասին, որտեղ իր թեկնածությունը չի առաջադրի:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ. Հայոց ցեղասպանության միջազգային ճանաչման գործընթացին:–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում