ԱԻՆ-ը և ՀՀ էլցանցերը կհամագործակցեն աղետների կանխարգելման ոլորտում
ԵՐԵՎԱՆ, 18 հունվարի. /Նովոստի-Արմենիա/. Չորեքշաբթի ՀՀ Արտակարգ իրավիճակների նախարար Արմեն Երիցյանը և «Հայաստանի էլեկտրական ցանցեր» ՓԲԸ գլխավոր տնօրեն Եվգենի Բիբինը համաձայնագիր են ստորագրել` բնական և տեխնածին բնույթի արտակարգ իրավիճակների կանխարգելման և հնարավոր հետևանքների վերացման ոլորտում համագործակցության մասին։
Փաստաթղթի տակ ստորագրել են ԱԻՆ ղեկավար Երիցյանը և ՀԷՑ գլխավոր տնօրեն Եվգենի Բիբինը:
Ըստ Երիցյանի՝ համաձայնագիրը համագործակցություն է նախատեսում բնական և տեխնածին բնույթի արտակարգ իրավիճակների սպառնալիքի կամ առաջացման դեպքում տեղեկատվության օպերատիվ փոխանակման, արտակարգ իրավիճակների մասին տեղեկատվության ներկայացման ուղղությամբ հիմնական չափանիշների համաձայնեցման ոլորտում, կողմերի տեղեկատվական համակարգերի ստեղծման և զարգացմանն ուղղված ջանքերի համակարգում, ինչպես նաև խորհրդակցությունների, սեմինարների, հետազոտությունների, փորձաքննությունների համատեղ կազմակերպում և անցկացում, փորձի փոխանակում, էներգետիկ ոլորտում արտակարգ իրավիճակների աղբյուրների մոնիթորինգի միասնականացված մեթոդաբանության կիրառում, դրանց արդյունավետության բարձրացում։
«Արտակարգ իրավիճակների նախարարությունը, ստեղծելով աղետների ռիսկի նվազեցման ազգային պլատֆորմը` ԱՌՆԱՊ-ը, աղետների ռիսկի նվազեցման գործընթացի մեջ է ներգրավում ոչ միայն պետական կառավարման և տեղական ինքնակառավարման մարմիններին, կազմակերպություններին, այլև մասնավոր, նաև` ռազմավարական նշանակություն ունեցող ձեռնարկություններին և ընկերություններին։ Բնականաբար դրանց թվում է «Հայաստանի էլեկտրական ցանցեր» ՓԲԸ-ն»,- փաստաթղթի ստորագրումից հետո լրագրողներին ասաց նախարարը:
ՀԷՑ գլխավոր տնօրեն Եվգենի Բիբինն իր կողմից նշեց, որ ընկերությունը մեծ հույսեր է կապում ԱԻՆ-ի հետ ստորագրած համաձայնագրի հետ և վստահություն հայտնեց, որ այն կհասնի իր նպատակին:
«Մենք կարևորում ենք տեղեկատվության օբյեկտիվությունը, թարմությունն ու արդիականությունը: Այդ պատճառով մենք համաձայնեցրեցինք մեր մամուլի ծառայությունների միջև տեղեկատվության փոխանակումը: Հուսով եմ մեր որոշումները կլրացնեն միմյանց»,- ասաց Բիբինը:
2011թ.-ին աղետների ռիսկերի նվազման ոլորտում ունեցած ձեռքբերումների համար ՄԱԿ-ը Հայաստանին որպես ձեռքբերումների երկիր է ճանաչել:
