Պատգամավորները հավանություն են տվել С1 և С2 կարգերի վարորդական իրավունքներ ստանալու համար ավտոդպրոցում պարտադիր ուսուցումը չեղյալ հայտարարելուն
ԵՐԵՎԱՆ, 30 նոյեմբերի. /Նովոստի-Արմենիա/. Հայաստանի Ազգային Ժողովը երեքշաբթի առաջին ընթերցմամբ մի շարք լրացումներ ընդունեց «Ճանապարհային երթևեկության անվտանգության ապահովման մասին» օրենքում, որոնք չեղյալ են հայտարարում С1 և С2 կարգերի վարորդական իրավունքներ ստանալու համար պարտադիր ուսուցումն ավտոդպրոցում:
С1 կարգի վարորդական իրավունքը տրամադրվում է 3,5-7,5 տոննա զանգվածով բեռնատար մեքենաներ վարելու համար, այդ թվում՝ 750 կգ զանգվածից ոչ ավելի քարշակով, իսկ С2 –ը՝ փոքր բեռնատարողության բեռնատար մեքենաներ վարելու համար:
«Այսուհետ կարելի է պարզապես դիմել Ճանապարհային ոստիկանություն, քննություն հանձնել С1 և С2 կարգի վարորդական իրավունք ստանալու համար: А1 և В1 կարգերի համար մենք արդեն նմանատիպ կարգ ներդրել ենք»,- ասաց, ներկայացնելով օրինագիծը, ՀՀ փոխոստիկանապետ Արթուր Օսիկյանը:
Բացի այդ, նրա խոսքով, նախատեսվում է երկարացնել Հայաստանում անժամկետ տրված վարորդական իրավունքի փոխարինման ժամկետը մինչև 2012 թվականի մարտի 31-ը:
«Ճանապարհային երթևեկության անվտանգության ապահովման մասին» օրենքում 2010 թվականի նոյեմբերի 15-ին կատարված լրացումների համաձայն` առաջարկվել է մինչև 2011 թվականի դեկտեմբերի 31-ը տրված անժամկետ վարորդական իրավունքը փոխարինել 10 տարին մեկ անգամ հաջորդ փոխարինմամբ, ինչպես նաև հատկապես վտանգավոր հիվանդությունների առկայության լրացուցիչ բուժզննում անցնելով:
«Անժամկետ իրավունքների փոխարինման ժամկետն առաջարկվում է երկարացնել, հաշվի առնելով, որ իրավունքը չփոխած վարորդների թիվը կազմում է 20 հազար»,- ասաց նա:
Օսիկյանն ընդգծեց նաև, որ տվյալ պահին ոստիկանությունը ձեռնարկում է հնարավոր բոլոր քայլերը վարորդական վկայականների ստացման հերթերի վերացման և ստացման ժամկետի կրճատման համար:
«Մեկ ամսվա ընթացքում ոստիկանության բարեփոխումների շրջանակներում Էրեբունի վարչական շրջանում շահագործման կհանձնվի միջազգային չափանիշներին համապատասխանող Քննական կենտրոն, որտեղ կտեղադրվի վեց միավոր սարքավորում իրավունքների պատրաստման համար, և կկիրառվի «մեկ պատուհանի» սկզբունքը»,- ընդգծեց փոխոստիկանապետը: -0-