Նոր էներգանախագծերը չպետք է խախտեն ուժերի հավասարակշռությունը Հարավային Կովկասում. ՀՀ նախագահ
![Նոր էներգանախագծերը չպետք է խախտեն ուժերի հավասարակշռությունը Հարավային Կովկասում. ՀՀ նախագահ Նոր էներգանախագծերը չպետք է խախտեն ուժերի հավասարակշռությունը Հարավային Կովկասում. ՀՀ նախագահ](/upload/iblock/70e/78aztolp0bd9t6dr6pyals1imev2vyq1.jpg)
ԵՐԵՎԱՆ, 17 նոյեմբերի. /Նովոստի-Արմենիա/. Էներգետիկ նոր նախագծերը չպետք է օգտագործվեն Հարավային Կովկասի տարածաշրջանում ուժերի առկա հավասարակշռության խախտման նպատակով, նշվում է Երևանում անցկացվող «Հարավային Կովկասում տարածաշրջանային անվտանգության դինամիկա» միջազգային համաժողովի մասնակիցներին ուղղված ՀՀ նախագահ Սերժ Սարգսյանի ուղերձում:
Երևանում նոյեմբերի 17-18-ն անցկացվող համաժողովին մասնակցում են անվտանգության ոլորտի փորձագետներ Հայաստանից, ԱՄՆ-ից, Ռուսաստանից, Թուրքիայից, Իսրայելից, Կանադայից, Մեծ Բրիտանիայից և Ռումինիայից:
«Էներգետիկ գործոնը էական դեր է խաղում Հարավային Կովկասի աշխարհաքաղաքական գործընթացներում, և Հայաստանը ըմբռնումով է մոտենում էներգակիրների մատակարարման նոր աղբյուրների և ուղիների ձևավորման քաղաքականությանը: Սակայն էներգետիկ նոր նախագծերը չպետք է օգտագործվեն տարածաշրջանում ուժերի առկա հավասարակշռության խախտման նպատակով», - ասել է Սարգսյանը, հաղորդում է «ՌԻԱ Նովոստին»:
Նա նշել է, որ նման քաղաքականությունը ոչ միայն վտանգում է տարածաշրջանի երկրների անվտանգությանը, այլև կարող է լրջորեն խոչընդոտել էներգակիրների անխափան մատակարարմանը:
«Չի կարելի թույլ տալ, որպեսզի Հարավային էներգետիկ միջանցքը դառնա նոր պատերազմ սնուցող աղբյուր: Այս ամենը չի բխում ոչ միայն տարածաշրջանի անվտանգության շահերից, այլև նավթային և գազային ընկերությունների շահերից», - հայտարարել է ՀՀ նախագահը:
Հարավային էներգետիկ միջանցքը նախատեսում է դեպի Եվրոպա գազի մատակարարում Կենտրոնական Ասիայի երկրներից և Ադրբեջանից`շրջանցելով Ռուսաստանը և իր մեջ է ներառում Nabucco, ТАР (Անդրադրիատիկ գազատար) և ITGI (Թուրքիա-Հունաստան-Իտալիա) գազատարների նախագծերը:-0-