Արենիում անցկացված գինու փառատոնը կօգնի զբոսաշրջության զարգացմանն ու միջազգային շուկա հայկական գինու դուրս գալուն
![Արենիում անցկացված գինու փառատոնը կօգնի զբոսաշրջության զարգացմանն ու միջազգային շուկա հայկական գինու դուրս գալուն Արենիում անցկացված գինու փառատոնը կօգնի զբոսաշրջության զարգացմանն ու միջազգային շուկա հայկական գինու դուրս գալուն](/upload/iblock/b82/or6tld3q0dq7p2njqcs1pqc5064ukmbw.jpg)
ԵՐԵՎԱՆ, 10 հոկտեմբերի. /Նովոստի-Արմենիա/. Հայաստանի Վայոց Ձորի մարզի Արենի գյուղում կազմակերպված գինու փառատոնն աջակցում է հանրապետությունում զբոսաշրջության զարգացմանն ու կարող է օգնել միջազգային շուկա հայկական գինու դուրս գալուն:
Շաբաթ օրը Արենիում կայացել է Գինու երրորդ փառատոնը: Փառատոնի շրջանակներում գինու ութ գործարաններ մրցել են «Ոսկե տակառիկ 2011» մրցանակի համար:
Գինու գործարանների ներկայացուցիչները մրցել են «Լավագույն կարմիր չոր գինի» անվանակարգում, որի հաղթող է ճանաչվել «Գինեթաս» ընկերությունը:
Բացի այդ, գյուղի 40 գինեգործներ մրցել են «Լավագույն տնական գինի» անվանակարգում, որի հաղթողը՝ Արենի գյուղի խաղողագործ Նվեր Ղազարյանն արժանացել է ՀՀ գյուղատնտեսության նախարար Սերգո Կարապետյանի պատվոգրին:
Փառատոնի ընթացքում «Բեխտերևկա» գինու գնորդների շրջանում խաղարկվել է դեպի Պրահա երկու ավիատոմս: Հաղթող է ճանաչվել երկու տարեկան Զավեն Ստեփանյանը:
Նշելով փառատոնի անցկացման նպատակները՝ կազմակերպիչներն ու հյուրերն ընդգծել են փառատոնի դերը զբոսաշրջության զարգացման գործում, ինչպես նաև տեղական արտադրողներին ցուցաբերվող աջակցությունը, որոնց գինիներն ունեն միջազգային շուկա դուրս գալու բոլոր հնարավորությունները:
«Եթե մենք ցանկանում ենք լինել զբոսաշրջության հայտնի, ճանաչված և գրավիչ կենտրոն, ապա Երևանում և հայկական առանձին համայնքներում պետք է ավելի հաճախ ու բարձր մակարդակով կազմակերպվեն նմանատիպ միջոցառումներ», - փառատոնի ընթացքում լրագրողներին է ասել ՀՀ էկոնոմիկայի նախարարության Զբոսաշրջության վարչության պետ Մեխակ Ապրեսյանը:
Նա նշել է, որ տարեցտարի ավելանում է փառատոնին աջակցող կազմակերպությունների թիվը: Այսպես, այս տարի տեղի համայնքի բնակիչները ստեղծել են «Արենի» հիմնադրամը, որը զբաղվում է փառատոնի կազմակերպչական հարցերով:
Այս ամենի կապակցությամբ փառատոնի ժյուրիի նախագահ, սոմելյե Սերժ Ղուկասյանն ընդգծել է, որ Հայաստանն ունի բոլոր բարենպաստ կլիմայական պայմանները՝ խաղող աճեցնելու և բարձրորակ գինի արտադրելու համար, ինչը թույլ կտա մեր երկրին դուրս գալ միջազգային շուկա:
Փառատոնի նախագահ Նունե Մանուկյանն իր հերթին ընդգծել է, որ այս միջոցառումը թույլ կտա աջակցել ոչ միայն Արենիի, այլև մերձակա գյուղերի բնակիչներին:
Փառատոնի շրջանակներում ելույթ ունեցան հայկական հայտնի ազգագրական «Կարին» պարային համույթը, արվեստի տարբեր դպրոցների սաներ և ժողովրդական երգիչներ:
Արենի գյուղում Գինու փառատոնն անցկացվում է 2009 թ.-ից ՀՀ էկոնոմիկայի և Գյուղատնտեսության նախարարությունների աջակցությամբ: Փառատոնի անցկացման համար ընտրվել է Արենի գյուղը, քանի որ այստեղ հայ հնագետները հայտնաբերել են գինու հնագույն մամլիչի հետքեր:-0-