Հայաստանը կրկին առանց գազ է մնացել Ռուսաստանում մայրուղային գազատարի վերանորոգման պատճառով
![Հայաստանը կրկին առանց գազ է մնացել Ռուսաստանում մայրուղային գազատարի վերանորոգման պատճառով Հայաստանը կրկին առանց գազ է մնացել Ռուսաստանում մայրուղային գազատարի վերանորոգման պատճառով](/upload/iblock/324/ue10xgxb0wm01t1cxgg31d3p1jejspa4.jpg)
Հայաստան ռուսական բնական գազի մատակարարումը ժամանակավորապես դադարեցվել է՝ այս անգամ ռուսական կողմի նախաձեռնությամբ Հյուսիսային Կովկաս-Անդրկովկաս մայրուղային գազատարի 52 կմ-ի հատվածում արտապլանային վերանորոգման աշխատանքներ իրականացնելու պատճառով:
««Գազպրոմ էկսպորտ» ԲԲ ընկերությունը պաշտոնապես տեղեկացրել է «ՀայՌուսգազարդին» սեպտեմբերի 28-ին ժամը 09:00-ից մինչև սեպտեմբերի 30-ի ժամը 21:00-ը Հայաստան բնական գազի մատակարարումը ժամանակավորապես դադարեցնելու մասին»,-չորեքշաբթի «Նովոստի-Արմենիա» գործակալությանը հաղորդեցին «ՀայՌուսգազարդ» ՓԲԸ մամուլի ծառայությունից:
Հաղորդագրության համաձայն` ռուսական ընկերությունը նախատեսում է Ռուսաստանի տարածքում արտահերթ արտապլանային վերանորոգման աշխատանքներ իրականացնել Հյուսիսային Կովկաս-Անդրկովկաս մայրուղային գազատարի 52 կմ-ի հատվածում:
«Հայռուսգազարդը» հավաստիացնում է, որ այս ընթացքում հանրապետության սպառողների գազամատակարարումը կիրականացվի պահուստային ռեզերվների հաշվին` առանց սահմանափակումների:
Ավելի վաղ` սեպտեմբերի 22-27-ը, Հայաստան բնական գազի մատակարարումը նույնպես ժամանակավորապես դադարեցվել էր՝ Վրաստանի տարածքում Սագուրամո-«Կրասնի Մոստ» 1000 մմ մայրուղային գազատարի նոր հատվածի միացման աշխատանքներն իրականացնելու կապակցությամբ՝ Թբիլիսիի շրջանցիկ ավտոճանապարհի վերակառուցման հետ կապված:
Անհրաժեշտության դեպքում Հայաստանի սպառողների գազամատակարարումն իրականացվում է Աբովյանի գազապահեստարանի պաշարների հաշվին, որը Հայաստանի գազատրանսպորտային համակարգի (ԳՏՀ) գլխավոր տարրերից մեկն է, որն ապահովում է հանրապետության էներգետիկ անվտանգությունը։Կայանը, կախված տարվա եղանակից, ի վիճակի է կարևորագույն սպառողներին վառելիքով մատակարարել 1-1,5 ամսվա ընթացքում։
«ՀայՌուսգազարդ» ՓԲԸ-ն Հայաստանի ներքին շուկայում ռուսական բնական գազի մատակարարման և տեղաբաշխման մենաշնորհային իրավունք ունի։ Ընկերությունը ստեղծվել է 1997 թ.-ին, նրա բաժնետերերն են «Գազպրոմ» ԲԲԸ-ն և Հայաստանի կառավարությունը:--0--