Իշխող ՀՀԿ-ն մինչև դեկտեմբեր կհրապարակի խորհրդարանական ընտրությունների կուսակցական ցուցակը
![Իշխող ՀՀԿ-ն մինչև դեկտեմբեր կհրապարակի խորհրդարանական ընտրությունների կուսակցական ցուցակը Իշխող ՀՀԿ-ն մինչև դեկտեմբեր կհրապարակի խորհրդարանական ընտրությունների կուսակցական ցուցակը](/upload/iblock/e35/zse8yoo11l7bihxaulz3fmv8al3pr36x.jpg)
ԵՐԵՎԱՆ, 26 սեպտեմբերի. /Նովոստի-Արմենիա/. Առաջիկա խորհրդարանական ընտրություններին Հայաստանի Հանրապետական կուսակցության համամասնական ցուցակը կհրապարակվի նոյեմբերի վերջին - դեկտեմբերի սկզբին՝ կուսակցության հերթական համագումարից հետո, երկուշաբթի լրագրողներին հայտնեց իշխող Հայաստանի Հանրապետական կուսակցության խորհրդարանական խմբակցության քարտուղար Էդուարդ Շարմազանովը:
Ըստ լուրերի և հայկական մամուլի հրապարակումների՝ ՀՀԿ խորհրդարանական ցուցակն արդեն պատրաստ է, և ցուցակում առաջին տեղում է Տիգրան Սարգսյանը (ՀՀ վարչապետ), իսկ շտաբի ղեկավար կդառնա խորհրդարանի խոսնակ Հովիկ Աբրահամյանը:
«Նման խոսակցություններն անհիմն են, քանի որ ոչ մի ցուցակ մենք չենք էլ պատրաստել, և ցուցակում առաջին անձանց վերաբերյալ դեռ ոչ մի հայտարարություն ես չեմ կարող անել»,- ասաց Շարմազանովը:
Միաժամանակ նա ավելացրեց, որ առաջիկա խորհրդարանական ընտրությունների ժամանակ ՀՀԿ-ն թեկնածուների ընդլայնված և թարմացված ցուցակով հանդես կգա:
Բացի այդ, Շարմազանովը մեկնաբանեց պատգմավոր Ռուբեն Հայրապետյանի վերջին հայտարարությունը, որ նա չի մասնակցելու առաջիկա ընտրություններին, քանի որ «գործարարները պետք է գործով զբաղվեն, իսկ քաղաքական գործիչները՝ քաղաքականությամբ»:
«Դա իր իրավունքն է` ընտրություններին մասնակցել կամ ոչ, կարող եմ միայն վստահությամբ հայտնել, որ նախընտրական ցուցակում կներկայացվեն արժանի անձինք»,- հայտնեց Շարմազանովը:
Ռուբեն Հայրապետյանն իշխող Հայաստանի Հանրապետական կուսակցության անդամ է: Նա երկու անգամ խորհրդարանի պատգամավոր է ընտրվել մեծամասնական համակարգով (2003- 2007 թվականներին): -0-