Երևանում «City Tour» զբոսաշրջային ծրագրի մեկնարկը հետաձգվում է ՀՀ անկախության 20-ամյակի կապակցությամբ. քաղաքապետարան
Երևանի զբոսաշրջիկների համար նախատեսված «City Tour» զբոսաշրջային ծրագրի մեկնարկը հետաձգվում է մինչև սեպտեմբերի 22-ը՝ ՀՀ անկախության օրվան նվիրված միջոցառումների կազմակերպման կապակցությամբ, հաղորդում է մայրաքաղաքի քաղաքապետարանի հասարակայնության հետ կապերի վարչությունը:
Ավելի վաղ Երևանի քաղաքապետարանի կողմից տարածած հաղորդագրության համաձայն՝ ծրագիրը պետք է մեկնարկեր սեպտեմբերի 17-ին:
Ինչպես նշվում է հաղորդագրության մեջ, ծրագրի մեկնարկը տեղափոխվել է ՀՀ անկախության օրվան նվիրված միջոցառումների կազմակերպման և անցկացման նպատակով մայրաքաղաքի կենտրոնական որոշ փողոցներում երթևեկության ժամանակավոր դադարեցման հանգամանքով պայմանավորված:
«Տեղեկացնենք, որ Երևանի քաղաքապետի նախաձեռնությամբ սեպտեմբերի 22-24-ը «Սիթի տուրի» էքսկուրսիաները կիրականացվեն բացառապես երեխաների համար ՝ անվճար սկզբունքով»,- նշվում է հաղորդագրության մեջ:
Երկժամյա տևողությամբ տուրերը կլինեն ամեն օր ժամը 11:00-ից սկսած մինչև 20:00-ն` Երևանի Ֆրանսիայի հրապարակից:
Ավտոբուսային տուրերը կունենան 8 կանգառ, ընդ որում, «Սիթի տուրի» տոմսը ուժի մեջ է լինելու 4 ժամ, այսինքն` ուղևորին կընձեռվի նախընտրած կանգառում ավելի երկար մնալու և երթուղին հաջորդ ավտոբուսով շարունակելու հնարավորություն:
Հատուկ «Սիթի-տուրի» համար քաղաքապետարանն առաջին անգամ մշակել և տպագրել է զբոսաշրջիկների համար նախատեսված ուղեցույցներ` մեկը տեղեկատվական է, իսկ երկրորդը` ֆոտոուղեցույց: Երևանի հուշարձանների և մշակութային կենտրոնների մասին տեղեկությունը հասանելի կլինի հինգ լեզուներով: Մամուլի հաղորդագրության համաձայն` մինչև յոթ տարեկան երեխաները կսպասարկվեն անվճար: -0-