ԵՐԵՎԱՆ, 19 ապրիլի. /Նովոստի-Արմենիա/. ՀՀ ԱԳ նախարար Էդվարդ Նալբանդյանը շնորհակալություն է հայտնել Հայ-բրիտանական բարեկամության խորհրդարանական խմբի նախագահ Քերոլայն Քոքսին հայանպաստ գործունեության համար, «Նովոստի-Արմենիա» գործակալությանը տեղեկացրեցին ՀՀ ԱԳՆ մամուլի ծառայությունից:
«Ողջունելով բարոնուհուն` նախարար Նալբանդյանը բարձր է գնահատել տարիներ ի վեր Քերոլայն Քոքսի ցուցաբերած աջակցությունը Հայաստանին ու Արցախին, նրա կողմից ծավալած մարդասիրական գործունեությունը՝ նշելով, որ հայ ժողովուրդը շնորհակալ է բարոնուհուն իր հայանպաստ գործունեության համար», - նշվում է տեղեկատվության մեջ:
Բրիտանական խորհրդարանական պատվիրակության հետ հանդիպման ընթացքում ՀՀ արտգործնախարարը կարևորել է երկու երկրների միջև հարաբերությունների զարգացումը ինչպես երկկողմ այնպես էլ բազմակողմ ձևաչափերում: Արծարծվել է ապակենտրոնացված համագործակցության հնարավորությունը:
Բարոնուհի Քոքսը, ընդգծելով, որ 1988 թ.-ից սերտորեն կապվել է Հայաստանի և հայ ժողովրդի հետ և իրեն համարում է հայ ժողովրդի բարեկամը, ասել է, որ շարունակելու է իր գործունեությունը ի նպաստ հայ-բրիտանական հարաբերությունների ամրապնդման:
Նախարար Նալբանդյանն ու բրիտանացի խորհրդարանականները քննարկել են հայ-բրիտական փոխգործակցության խորացման հեռանկարները: Այդ համատեքստում երկուստեք կարևորվել է այս տարվա մարտին ԱԺ նախագահի` Լոնդոն կատարած այցելությունը և ՄԹ խորհրդարանի երկու պալատների ղեկավարների հետ ունեցած հանդիպումները:
Հանդիպմանը կողմերն անդրադարձել են նաև Հայաստան-Եվրոպական Միություն համագործակցությանը և այդ ձևաչափում ընթացող գործընթացներին:
Քերոլայն Քոքսի խնդրանքով՝ Էդվարդ Նալբանդյանը ներկայացրել է արցախյան հիմնախնդրի կարգավորման գործընթացի վերջին զարգացումները:-0-