ԵՐԵՎԱՆ, 20 մարտի./Նովոստի–Արմենիա/. Հայաստանը վաղաժամ է համարում քննարկել ՀԱՊԿ նոր գլխավոր քարտուղարի թեկնածությունը մինչև մի շարք իրավաբանական բացթողումների կարգավորում, չորեքշաբթի լրագրողներին ասաց ՀՀ ԱԳՆ մամուլի քարտուղար Աննա Նաղդալյանը։
ՀԱՊԿ գլխավոր քարտուղարի ժամանակավոր պաշտոնակատար Վալերի Սեմերիկովը չորեքշաբթի հայտարարել է, որ ՀԱՊԿ գլխավոր քարտուղարի պաշտոնում Բելառուսի թեկնածուի համաձայնեցման վերաբերյալ անհրաժեշտ բոլոր փաստաթղթերն ուղարկվել են կազմակերպության բոլոր մասնակից երկրներին։
«Հայաստանի համար առաջնահերթ է ՀԱՊԿ գլխավոր քարտուղարի նշանակման հիմնական սկզբունքի ամրագրումը, և քանի դեռ չի վերացել իրավաբանական բացթողումը վաղաժամ է խոսել նոր գլխավոր քարտուղարի նշանակման մասին», – ասաց Նաղդալյանը։
Նա հիշեցրեց, որ ՀՀ վարչապետ Նիկոլ Փաշինյանն արդեն հայտարարել է, որ առանց Հայաստանի նոր գլխավոր քարտուղարի թեկնածության հարցով որոշում չի լինի։
Загружается новость ... "Лево"
Նաղդալյանը նաև հիշեցրեց, որ ՀԱՊԿ–ում որոշումներն ընդունվում են կոնսենսուսի հիման վրա, որն ընդունելի է որոշման բոլոր կողմերի համար։
«Մենք միշտ ընդգծել ենք ՀԱՊԿ–ի կարևորությունը Հայաստանի անվտանգության համակարգում և քայլեր ենք ձեռնարկում` ուղղված կառույցի արդյունավետության բարձրացմանը` բոլոր կողմերի կոնսենսուսային որոշման հիման վրա։ Գլխավոր քարտուղարի թեկնածության շուրջ քննարկումները շարունակվում են», – նշեց Նաղդալյանը։
ՀԱՊԿ գլխավոր քարտուղարի պաշտոնը թափուր է մնացել 2018 թ.-ի հոկտեմբերի 30-ից,երբ Հայաստանը հետ է կանչել իր ներկայացուցիչ Յուրի Խաչատուրովին` առանց կազմակերպության այլ անդամ պետությունների հետ նախնական համաձայնության: Այժմ ՀԱՊԿ գլխավոր քարտուղարի պարտականությունները կատարում է Ռուսաստանի ներկայացուցիչ Վալերի Սեմերիկովը:
Երևանը պահանջում է իր թեկնածուի նշանակումը, քանի որ Խաչատուրովը աշխատել է սահմանված երեք տարիների միայն կեսը (Հայաստանի պաշտոնավարման ժամկետնավարտվում է 2020 թ.-ին): Դրա հետ համաձայն չէ, մասնավորապես, Բելառուսի նախագահ Ալեքսանդր Լուկաշենկոն` ձգտելով իր երկրին փոխանցել ՀԱՊԿ գլխավոր քարտուղարի լիազորությունները:-0-