Մոսկվայի պայմանագրի չեղարկման նախաձեռնությունը որևէ կերպ չի ազդի Հայաստանի վրա. քաղաքագետ
ԵՐԵՎԱՆ, 9 փետրվարի. /Նովոստի–Արմենիա/. Մոսկվայի պայմանագրի չեղարկման մասին ռուս պատգամավորների նախաձեռնությունը որևէ կերպ չի ազդի Հայաստանի վրա, «Նովոստի–Արմենիա» գործակալությանն ասաց Կովկասի ինստիտուտի տնօրեն, քաղաքագետ Ալեքսանդր Իսկանդարյանը։
Պետդումայի պատգամավորներ Վալերի Ռաշկինը և Սերգեյ Օբուխովը (ՌԴԿԿ խմբակցություն) երկրի ղեկավարությանը և ԱԳՆ–ին նամակ են ուղղել` խնդրելով չեղյալ հայտարարել 1921 թվականի մարտի 16–ին ՌԽՖՍՀ և Թուրքիայի ժողովրդական գերագույն ժողովի կառավարության ստորագրած եղբայրության և բարեկամության Մոսկվայի պայմանագիրը։
Պետդումայի պատգամավորներն առաջարկում են չեղարկել Արարատը Թուրքիային հանձնած պայմանագիրը>>
«Չեմ կարծում, որ լրջորեն կարելի է չեղարկել Մոսկվայի պայմանագիրը։ Այդ չեղարկումը դժվար թե ինչ–որ բան փոխի իրավաբանական իրականության մեջ», – ասաց Իսկանդարյանը։
Միաժամանակ նա կասկած հայտնեց, որ այդ պայմանագիրը կչեղարկվի Ռուսաստանի խորհրդարանի և նախագահի կողմից։
«Իսկ մինչև այդ դա ռուսական երևույթ է, որը նախատեսված է ներքին շուկայի համար։ Չեմ կարծում, որ այդ ամենը որևէ հետևանք կունենա Հայաստանի համար», – ասաց Իսկանդարյանը։
Քաղաքագետը նաև կարծում է, որ Մոսկվայի պայմանագրի չեղարկման մասին ռուս պատգամավորների հայտարարությունները Թուրքիայի և Ռուսաստանի միջև քարոզչական պատերազմի փուլերից մեկն է։
Այս նախաձեռնությանը կողմ են նաև «Արդար Ռուսաստանում»։ Պետդումայի պատգամավոր Օլեգ Պախոլկովի խոսքով` Մոսկվայի պայմանագիրը ստորագրվել էր ի վնաս Ռուսաստանի շահերի։
Օբուխովը նշել է, որ «անդրկովկասյան երեք հանրապետություններից երկուսը` Վրաստանը և Հայաստանը, չեն ընդունում պայմանագրի պայմանները` այն անարդար համարելով»։ «Պետք է հիշել, որ 1921 թվականին բոլշևիկների իշխանությունը դեռևս բառացիորոն մազից էր կախված` շարունակվում էր օտարերկրյա ինտերվենցիան, քաղաքացիական պատերազմը։ Այդ պայմաններում Խորհրդային Ռուսաստանը չէր կարող ուժ կիրառել և Թուրքիայի վզին փաթաթել պայմանագրի ավելի շահավետ պայմաններ»,– ասում է կոմունիստը։
Պայմանագրի համաձայն` «Կարսի մարզը և նախկին Բաթումի մարզի հարավային մասը (Ռուսական կայսրության կազմում էին 1878 թվականից), ինչպես նաև Էրիվանի նահանգի Սուրմալու գավառն (Ռուսական կայսրությունում էր 1828 թվաիկանից) Արարատ լեռան հետ անցնում էին Թուրքիային»։ -0-
