Հունաստանի պաշտպանության նախարարը ռազմական հանցագործություն է որակել Թուրքիայի կողմից ռուսական Սու–24–ի ոչնչացումը

ԵՐԵՎԱՆ, 16 դեկտեմբերի. /Նովոստի–Արմենիա/. Թուրքիայի կողմից ռուսական Սու–24–ի ոչնչացումը ռազմական հանցագործություն է, Երևանում չորեքշաբթի իր հայ գործընկեր Սեյրան Օհանյանի հետ կայացած համատեղ ճեպազրույցի ժամանակ հայտարարեց Հունաստանի ազգային պաշտպանության նախարար Պանայոտիս Կամմենոսը։ 

«Թուրքիան այդպես էլ չկարողացավ ապացուցել սեփական օդային տարածքի խախտման փաստը։ Գոյություն ունեցող տվյալները վկայում են այն մասին, որ միջադեպը տեղի է ունեցել Սիրիայի օդային տարածքում։ Միաժամանակ խոցված Սու–24–ի երկու օդաչուներից մեկի սպանությամբ խախտվել են Ժնևյան պայմանավորվածություններն ու միջազգային իրավունքները։ Սա ռազմական հանցագործություն է, հարգանքի բացակայություն միջազգային իրավունքի նկատմամբ», – հայտարարեց Կամմենոսը։

Նրա խոսքով` Թուրքիան պարբերաբար խախտում է Հունաստանի օդային և ջրային սահմանները։

«Եթե Թուրքիան ցանկանում է համապատասխանել միջազգային նորմերին, ապա պետք է դադարեցնի նման գործողությունները», – ընդգծեց նախարարը։–0–