ԵՐԵՎԱՆ, 13 նոյեմբերի. /Նովոստի–Արմենիա/. ԵԱՀԿ Մինսկի խմբի համանախագահները տարածած հայտարարությունում ընդգծել են, որ Լեռնային Ղարաբաղի հակամարտության կարգավորման ձևաչափը փոխելու փորձերը կխոչընդոտեն գործընթացի առաջխաղացմանը։
Խոսելով Եվրոպայի խորհրդի խորհրդարանական վեհաժողովում քննարկվող ղարաբաղյան հակամարտության բանաձևի մասին` Միացյալ Նահանգները, Ֆրանսիան և Ռուսաստանը ներկայացնող միջնորդները նախազգուշացրել են, որ առաջարկություններ են հնչում բանակցությունների և աշխատանքային խմբերի նոր ձևաչափերի ստեղծման վերաբերյալ։
«Մենք կարծում ենք, որ Մինսկի խումբն ունի միջնորդի առաքելության բացառիկ փորձ։ Մինսկի խմնի ձևաչափն ընդունելի է բոլոր կողմերի համար և օգտվում է ԵԱՀԿ բոլոր անդամ պետությունների վստահությունից։ Հաշվի առնելով բանակցությունների նրբությունը` ձևաչափը փոխելու կամ զուգահեռ մեխանիզմների ստեղծման փորձերը կարող են խախտել բանակցությունների գործընթացը և խոչընդոտել կարգավորման առաջխաղացմանը»,– միջնորդների հայտարարությունն է մեջբերում
«Ազատություն» ռադիոկայանի հայկական ծառայությունը։
Նախորդ շաբաթ Եվրոպայի խորհրդի խորհրդարանական վեհաժողովի քաղաքական հարցերի հանձաժողովը հավանություն է տվել բրիտանացի պատգամավոր Ռոբերտ Ուոլթերի «Բռնության աճը Լեռնային Ղարաբաղում և Ադրբեջանի օկուպացված այլ տարածքներում» վիճելի զեկույթի նախագծին։ ԵԱՀԿ ՄԽ համանախագահներ Ջեյմս Ուորլիքը (ԱՄՆ), Իգոր Պոպովը (Ռուսաստան) և Պիեր Անդրիյեն (Ֆրանսիա) ընդգծել են միջազգային բոլոր այն կազմակերպությունների հետ գործակցելու պատրաստակամությունը, որոնք շահագրգռված են հակամարտության արդար և կայուն կարգավորմամբ։
«Մենք ի գիտություն ենք առնում ԵԱՀԿ–ի` հակամարտության կարգավորման ջանքերը։ Մենք կիսում ենք զեկույցում արտահայտված մտահոգությունը հայ–ադրբեջանական սահմանում, ինչպես նաև շփման գծի երկայնքով լարվածության աճի հարցում։ Խորն ափսոսանք ենք արտահայտում մարդկային զոհերի, այդ թվում` քաղաքացիական անձանց մահվան դեպքերի կապակցությամբ»,– ասել են միջնորդները, համաձայնելով, որ «հակամարտությունը շատ երկար է տևում»։
«Կողմերը պետք է անհրաժեշտ քայլեր ձեռնարկեն խաղաղ կարգավորումն արագացնելու համար»,– նշել են դիվանագետները։
ՌԴ ԱԳՆ պաշտոնական ներկայացուցիչը հույս ունի, որ հանգստացրել է հայկական ԶԼՄ–ները Ղարաբաղի հարցում>>
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ.–ի դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Հանրաքվեին հաջորդեցին Ադրբեջանի ձեռնարկած ռազմական լայնածավալ գործողությունները, որոնց հետևանքով Ադրբեջանը կորցրեց վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ.–ի մայիսի 12-ին զինադադարի վերաբերյալ եռակողմ համաձայնագիր կնքելուց հետո հակամարտության գոտում դադարեցին ռազմական գործողությունները, որոնց հետևանքով երկու կողմն, ընդհանուր առմամբ, շուրջ 25-30 հազար զոհ ունեցավ, իսկ մոտ մեկ միլիոն մարդ էլ ստիպված լքեց բնօրրանը: Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է:
1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակում, որի համանախագահներն են ԱՄՆ-ն, Ռուսաստանը և Ֆրանսիան:-0-
