ԵՐԵՎԱՆ, 19 ապրիլի. /Նովոստի-Արմենիա/. Եվրոպայի խորհրդի խորհրդարանական վեհաժողովն ապրիլի 19-ին 44 պատվիրակների ստորագրությամբ ընդունեց Լեռնային Ղարաբաղի հակամարտության խաղաղ կարգավորման թիվ 603 գրավոր բանաձևը:
«Վստահ լինելով, որ ղարաբաղյան հակամարտության խաղաղ կարգավորումն այլընտրանք չունի, Խորհրդարանական վեհաժողովը վերահաստատում է ԵԱՀԿ Մինսկի խմբի` միջնորդության միջազգային համաձայնեցված միակ ձևաչափի համանախագահների ջանքերին ցուցաբերվող մշտական օժանդակությունն այս հակամարտության կայուն և արդար կարգավորման համար»,- նշվում է ԵԽԽՎ պաշտոնական կայքում հրապարակված բանաձևի տեքստում:
Փաստաթղթի հեղինակները կոչ են անում հարգել Մինսկի խմբի համանախագահների մշտական կոչերը, սատարել նրանց մանդատի և չբարդացնել շարունակվող բանակցությունները:
«Մենք կոչ ենք անում կողմերին վճռական քայլեր ձեռնարկել և անհրաժեշտ քաղաքական կամք դրսևորել համանախագահ երկրների` Ֆրանսիայի, ԱՄՆ-ի և Ռուսաստանի` 2009 թվականից սկսած նախագահների մակարդակով հինգ հայտարարություններում ամրագրված առաջարկությունների հիման վրա բանակցությունների կարգավորման հասնելու համար»,- նշվում է փաստաթղթում:
«Մենք կիսում ենք հակամարտության գոտում լարվածության բարձրացման կապակցությամբ առկա մտահոգությունը: Ծանր հրետանու, մասնավորապես, ականանետերի և հրթիռային համակարգերի կիրառումն անընդունելի է և լուրջ վտանգ է ներկայացնում քաղաքացիական բնակչության համար: Խորն ափսոսանք ենք հայտնում մարդկանց, այդ թվում` քաղաքացիական անձանց մահվան կապակցությամբ»,- ընդգծվում է բանաձևում:
Հեղինակները նշում են, որ «1994 թվականի հրադադարի համաձայանգրի շուրջ վստահության և համախմբան ամրապնդման քայլերին ուղղված հրադադարի ռեժիմի և Մինսկի խմբի համանախագահների այլ առաջարկությունների խախտումների քննության մեխանիզմների ստեղծումը կնպաստի լարվածության նվազեցմանը և խաղաղ կարգավորումների անցկացման ավելի բարենպաստ մթնոլորտի ստեղծմանը»:
Ապրիլի 2–ից 5–ն ադրբեջանական ԶՈՒ–ն ղարաբաղաադրբեջանական շփման գծի հարավային, հարավարևելյան և հյուսիսարևելյան ուղղություններով ձեռնարկել է բացահայտ հարձակողական գործողություններ` հրետանիով, զրահապատտրանսպորտայինմիջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները` հասցնելով մեծ վնասներ։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
