ԵՐԵՎԱՆ, 13 մարտի./Նովոստի–Արմենիա/. Եկել է ղարաբաղյան հակամարտության կարգավորման հնացած սկզբունքներից հրաժարվելու ժամանակը, և հարկավոր են նոր, իրատեսական առաջարկներ, չորեքշաբթի ասաց Արցախի ԱԳ նախարար Մասիս Մայիլյանը ԵԱՀԿ գործող նախագահ Միրոսլավ Լայչակի հետ հանդիպումից հետո։
Մարտի 9–ին ԵԱՀԿ ՄԽ համանախագահների տարածած հայտարարության մեջ նշվում է, որ արդար և կայուն կարգավորումը պետք է հիմնված լինի Հելսինկյան եզրափակիչ ակտի հիմնական սկզբունքների վրա, մասնավորապես` ուժի կամ ուժի սպառնալիքի չկիրառում, տարածքային ամբողջականություն և ժողովուրդների ինքնորոշման իրավունք։
«Ակտում պետք է ներառվեն նաև լրացուցիչ տարրեր, որոնք առաջարկվել են համանախագահ երկրների նախագահների կողմից 2009–2012թթ.–ին, այդ թվում` Լեռնային Ղարաբաղի շուրջ տարածքների վերադարձ Ադրբեջանի վերահսկողության տակ, Լեռնային Ղարաբաղի ժամանակավոր կարգավիճակ, որն ապահովում է անվտանգության և ինքնակառավարման երաշխիքներ, Լեռնային Ղարաբաղը Հայաստանին կապող միջանցք», – նշվում է հայտարարության մեջ։
Загружается новость ... "Лево"
Հայտարարության մեջ նաև նշվում է, որ Լեռնային Ղարաբաղի իրավական կարգավիճակի ապագա սահմանումը հնարավոր է ժողովրդի` իրավաբանորեն պարտադիր կամարտահայտության միջոցով։ Ամրագրված է նաև բոլոր ներքին տեղահանված և փախստականների իրավունքը` վերադառնալու իրենց բնակության նախկին վայրը, ինչպես նաև անվտանգության միջազգային երաշխիքները, որոնք կներառեն խաղաղարար գործողություններ։
«Եթե մնամ հին սկզբունքները, և Արցախը չմասնակցի բանակցություններին, ապա մենք չենք կարող արձանագրել որևէ առաջընթաց բանակցային գործընթացում», – ասաց Մայիլյանը։
Նախարարի խոսքով, վերջին 27 տարում արված և բանակցությունների սեղանին դրված բոլոր առաջարկները հնացել են և վերանայման կարիք ունեն։
Ինչ վերաբերում է ազատագրված տարածքների մի մասի «վերադարձին», ապա, նրա խոսքով, ղարաբաղյան հարցը տարածքային հակամարտություն չէ, ինչպես դա փորձում են ներկայացնել Ադրբեջանում։
«Դա անընդունելի է և խեղաթյուրում է հակամարտության էությունը», – նշեց Մայիլյանը։–0–
