ԵՐԵՎԱՆ, 10 ապրիլի. /Նովոստի-Արմենիա/. Ադրբեջանցի զինվորները և թուրք վարձկանները, մեր զինվորի գլուխը ձեռքերին, շրջել են իրենց գյուղերով` ի ցույց քրդերի, գրել է Լեռնային Ղարաբաղի Հանրապետության նախագահի մամուլի քարտուղար Դավիթ Բաբայանը Twitter-ի իր միկրոբլոգում:
Դավիթ Բաբայանը նշել է, որ մեր զինվորի գլուխը ձեռքերին ադրբեջանցիները շրջել են իրենց գյուղերով, իսկ նրանց խմբում թուրք ահաբեկիչները հայտարարել են, որ այդպես են վարվելու բոլոր եզդիների ու քրդերի հետ։
Ղարաբաղի զինծառայող, 20–ամյա շարքային Քյարամ Սլոյանը, ով եզիդաքուրդ ծագում ուներ, զոհվել է ԼՂՀ-ի հետ շփման գծում հրետակոծությունների ժամանակ: Մի քանի օր առաջ մամուլում և սոցցանցերում հայտնվել են սահմռկեցուցիչ կադրեր, որոնցում ադրբեջանցի զինծառայողները ցուցադրում են գլխատված Սլոյանի գլուխը:
Երկու օրվա որոնողական աշխատանքների արդյունքում հայկական կողմը հայտնաբերել է երկու հայ զինծառայողի մարմին, ադրբեջանցիները վերադարձրել են նաև գլխատված զինծառայողի՝ Քյարամ Սլոյանի գլուխը:
«Սա նաև քուրդ և եզդի ժողովուրդների նկատմամբ ցեղասպանություն է»,- հայտարարել է Դավիթ Բաբայանը։
Ապրիլի 1-ի լույս 2-ի գիշերը ղարաբաղա–ադրբեջանական շփման գծի հարավային, հարավարևելյան և հյուսիսարևելյան ուղղություններով հակառակորդը ձեռնարկել է բացահայտ հարձակվողական գործողություններ` հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները` հասցնելով մեծ վնասներ։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում
