ԵՐԵՎԱՆ, 7 ապրիլի. /Նովոստի-Արմենիա/. Կարմիր Խաչի Միջազգային Կոմիտեն երկոսություն է վարում անհետ կորած հայ զինծառայողներին վերադարձնելու հարցով, «Նովոստի-Արմենիա» գործակալությանն ասաց Երևանում ԿԽՄԿ ներկայացուցչության հաղորդակցման ծրագրերի ղեկավար Զառա Ամատունին:
Նախօրեին պաշտպանության նախարար Սեյրան Օհանյանը հայտնեց, որ հայկական կողմը ԿԽՄԿ-ի հետ աշխատանքներ է տանում Ղարաբաղում վերջին լարվածության սրման ժամանակ անհետ կորած հայ զինվորներին վերադարձնելու համար:
«Խոսքը փոխանակման մասին չէ, այլ` զինծառայողների փոխանցման։ Չեզոք միջնորդի շրջանակում մենք հակամարտության բոլոր կողմերի հետ շարունակում ենք երկխոսությունն ու քննարկումն այս հարցի շուրջ », - նշեց Ամատունին:
Նա ավելացրեց, որ դեռևս չի կարող ավելի մանրամասն ասել, թե կոնկրետ ինչ փուլում են գտնվում աշխատանքները, քանի որ այն բավական երկարատև գործընթաց է` հաշվի առնելով, որ աշխատանքներն ընթանում են անկայուն և մշտապես փոփոխվող իրավիճակում:
Այն հարցին` արդյո՞ք խոսքը ողջ մնացած, թե զոհված հայ զինծառայողների մասին է, Ամատունին նշեց, որ առայժմ այս հարցի շուրջ չի կարող մեկնաբանություն տալ:
«Կարող եմ միայն ասել, որ մեզ համար անհայտ կորածները և նրանց ընտանիքները առաջնահերթություն են, բացի այդ առաջարկել ենք կողմերին մեր ակտիվ աջակցությունը` օգնելու համար ճշտել այն զինծառայողների տվյալները, որոնք հայտարարված են անհետ կորած: Եվ մենք աշխտանում ենք այդ ոււղղությամբ», - ընդգծեց Ամատունին:
Նա ավելացրեց, որ աշխատանքները գաղտնի բնույթ են կրում:
Ապրիլի 1-ի լույս 2-ի գիշերը ղարաբաղա–ադրբեջանական շփման գծի հարավային, հարավարևելյան և հյուսիսարևելյան ուղղություններով հակառակորդը ձեռնարկել է բացահայտ հարձակվողական գործողություններ` հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները։ Օպերատիվ տվյալներով`մարտական գործողությունների ընթացքում ոչնչացվել է 2 ուղղաթիռ, շուրջ 30 տանկ, «Գրադ» տիպի համազարկային կայանք, ծանր հրանետային համակարգ (ТОС), ինժեներական տեխնիկա, 6 անօդաչու սարք։ Ադրբեջանական զինուժը տվել է 300-ից ավելի մարդկային կորուստ:
Հայկական կողմը կորցրել է 14 տանկ, ունի 33 զոհ, մոտ 121–ը վիրավոր է, անհետ կորած է համարվում 25–ը։ Զոհվել են նաև քաղաքացիական անձինք, այդ թվում` մեկ երեխա և յոթ կամավոր։ Մարտական գործողությունները դադարեցվել են ապրիլի 5–ին մոտավորապես ժամը 12։00–ին, երբ ուժի մեջ մտան համապատասխան պայմանավորվածությունները։ -0–