ԵՐԵՎԱՆ, 8 ապրիլի. /Նովոստի-Արմենիա/. Անթույլատրելի է ԼՂՀ–ի կողմից Ադրբեջանին ղարաբաղյան տարածքի որևէ հողակտորի փոխանցումը, հայտարարեց ղարաբաղյան պատերազմի հերոս, գեներալ–մայոր Արկադի Տեր–Թադևոսյանը (Կոմանդոս):
«Ղարաբաղը ոչ մի սանտիմետր չպետք է զիջի Ադրբեջանին: Եթե մենք հակառակորդին որևէ տարածք տանք, ապա կօգնենք նրան մոտենալ և խեղդել մեզ», - ասաց նա ուրբաթ լրագրողներին:
ՌԴ–ն կշարունակի զենք մատակարարել Ադրբեջանին. Ռոգոզին>>
Ինչպես կարծում է Տեր-Թադևոսյանը, չնայած ապրիլի 2-ից շփման գծում Բաքվի աննախադեպ ագրեսիայի հետևանքով Ղարաբաղի տված կորուստներին, լայնածավալ մարտական գործողությունների վերսկսման դեպքում Ադրբեջանը կկորցնի ավելի շատ, քան լարվածության սրման վերջին օրերին:
Կոմանդոսի խոսքով, Ադրբեջանի ածխաջրածնային հարստությունները նրա թույլ կողմն են, քանի որ Ադրբեջանը «նստած է» նավթային տակառի վրա` նավթամուղեր, նավթային հարթակներ, գազի վերամշակման ձեռնարկություններ։
«Եթե Ադրբեջանի վրա ուղղել մի քանի հրթիռ, կարելի է ոչնչացնել Ադրբեջանի տարածքի 30-40 տոկոսը», - հայտարարեց նա և ավելացրեց, որ Հայաստանը և ԼՂՀ-ն ունեն նման հնարավորություններ:
Ընդ որում, Կոմանդոսը նաև ընդգծեց, որ անհրաժեշտ է ճիշտ հունով օգտագործել Հայաստանում և Ղարաբաղում հայրենասիրական ոգու հուժկու վերելքը: Նա նշեց, որ հարկավոր է որակով նախապատրաստել երիտասարդ կամավորների կազմը:
Տեր-Թադևոսյանի խոսքով, նույնիսկ եթե կան որոշ հիմքեր ենթադրելու, որ Ադրբեջանի ագրեսիան ինչ-որ չափով անակնկալ էր ղարաբաղյան կողմի համար, ապա երկրորդ անգամ Ղարաբաղի պաշտպանությանն անակնկալի բերել չի ստացվի:
ՀՀ ՊՆ–ն հրապարակել է Արցախի մարտերում ապրիլի 2-8–ը զոհված 44 զինծառայողների անունները>>
Ապրիլի 1-ի լույս 2-ի գիշերը ղարաբաղաադրբեջանական շփման գծի հարավային, հարավարևելյան և հյուսիսարևելյան ուղղություններով հակառակորդը ձեռնարկել է բացահայտ հարձակվողական գործողություններ` հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները։ Օպերատիվ տվյալներով`մարտական գործողությունների ընթացքում ոչնչացվել է 2 ուղղաթիռ, շուրջ 30 տանկ, «Գրադ» տիպի համազարկային կայանք, ծանր հրանետային համակարգ (ТОС), ինժեներական տեխնիկա, 7 անօդաչու սարք։ Ադրբեջանական զինուժը տվել է 300-ից ավելի մարդկային կորուստ:
Հայկական կողմը կորցրել է 14 տանկ, ունի 44 զոհ, մոտ 122–ը վիրավոր է, անհետ կորած է համարվում 21–ը։ Զոհվել են նաև քաղաքացիական անձինք, այդ թվում` մեկ երեխա և յոթ կամավոր։ Մարտական գործողությունները դադարեցվել են ապրիլի 5–ին մոտավորապես ժամը 12։00–ին, երբ ուժի մեջ մտան համապատասխան պայմանավորվածությունները։ -0–
