480.74
+0.03
511.65
+0.46
7.48
-0.03
+1
Եղանակը Երևանում
Հայ
Միլզ. ԱՄՆ դեսպանատունը կաջակցի Հայաստանին մարտահրավերներին հակազդելու գործում
19:14
04 Դեկտեմբերի 2015
Հայ–ամերիկյան հարաբերությունները զարգանում են կառուցողական հունով։ Վերջերս ԱՄՆ–ի և Հայաստանի մոտ հետաքրքրություններ են առաջացել տնտեսական համագործակցության ոլորտում։ «Նովոստի–Արմենիա» գործակալությանը տված բացառիկ հարցազրույցում ՀՀ–ում ԱՄՆ արտակարգ և լիազոր դեսպան Ռիչարդ Միլզը խոսել է այն մասին, թե, արդյոք, մեր երկրները ներուժ ունեն հարաբերություններ հետագա զարգացման համար, ինչպե՞ս է վերաբերվում ԱՄՆ–ն ՀԱՊԿ–ին և ԵՏՄ–ին Հայաստանի անդամակցությանը, ԱՄՆ–ն ի՞նչ է մտածում սահմանադրական բարեփոխումների հանրաքվեի մասին։

«Նովոստի–Արմենիա» – Պարոն դեսպան, ինչպե՞ս կբնութագրեիք հայ–ամերիկյան հարաբերությունների ներկա մակարդակը։ Բավարարու՞մ է այն երկու կողմերին, և գոյություն ունի՞, արդյոք, ներուժ հարաբերությունների հետագա զարգացման համար։

Ռ. Միլզ – Հայ-ամերիկյան հարաբերությունները Հայաստանի անկախությունից ի վեր աստիճանական զարգացում են ապրել: Երբ 1990-ականներին ԱՄՆ պետքարտուղարությունում ես սկսեցի զբաղվել Հայաստանի հարցերով, հարաբերությունների բնույթը աջակցությունն էր Հայաստանին՝ անկախությանը հաջորդած առաջին դժվարություններով լեցուն տարիներին և օգնությունը` միտված երկրի հետխորհրդային բարեփոխումներին:

Այժմ այդ հարաբերությունները վերաճել են առևտրի վրա հիմնված հարաբերությունների, ինչի մասին են վկայում Առևտրի և ներդրումների հայ-ամերիկյան խորհրդի հաջողված անդրանիկ նիստը, ինչպես նաև Հայ-ամերիկյան տնտեսական համագործակցության միջկառավարական հանձնաժողովի նիստի ընթացքում քննարկված հիմնարար խնդիրները։ Մենք ընդլայնել ենք նաև մեր երկկողմ հարաբերությունները ռազմական ոլորտում և շարունակում ենք միասին աշխատել մի շարք այլ կարևոր ոլորտներում:

Նոյեմբերի 10-ին Հայ-ամերիկյան առևտրաարդյունաբերական պալատում ունեցած իմ ելույթում ես առանձնացրեցի չորս առաջնահերթ ոլորտներ` տնտեսական կապերի խորացում, Հայաստանի հետ համատեղ կոռուպցիայի դեմ պայքար, ժողովրդավարական հաստատությունների և քաղաքացիական հասարակության ամրապնդում, ԱՄՆ քաղաքականության ավելի համակողմանի ներկայացում, որոնցում երկկողմ հարաբերությունները կխորացվեն և կբարելավվեն իմ և դեսպանատան ջանքերով: Ես և դեսպանությունը կշարունակենք գործակցել հայ ժողովրդի հետ, երբ վերջիններս ջանում են երկրի առաջ ծառացած մարտահրավերներին հայկական լուծումներ գտնել:

«Նովոստի–Արմենիա» – Հայաստանը Ռուսաստանի հետ ներառված է միևնույն ռազմաքաղաքական դաշինքում, իսկ այս տարվա հունվարից երկիրը դարձավ ԵՏՄ լիիրավ անդամ։ Բացի այդ, Հայաստանում տեղակայված է ռուսական ռազմակայան։ Որքանո՞վ այս փաստերը կարող են ազդել Հայաստան–ԱՄՆ փոխհարաբերությունների վրա։

Ռ. Միլզ – Միացյալ Նահանգները գիտակցում են, որ Հայաստանի և Ռուսաստանի միջև առկա նշանակալի հարաբերությունները աշխարհագրական ու պատմական հիմքեր ունեն: Ձեր երկու երկրներն ունեն ամուր պատմական կապեր: Բայց ես իրապես հավատում եմ, կարծում եմ, որ հայերի մեծամասնությունը նույնպես հավատում է, որ հայ-ռուսական կապերը, ինչպես նաև Հայաստանի անդամակցությունն այնպիսի կազմակերպություններում, ինչպիսիք են Եվրասիական տնտեսական միությունը և Հավաքական անվտանգության պայմանագրի կազմակերպությունը չպետք է հետ պահի և հետ չի պահում Հայաստանին Միացյալ Նահանգների, Եվրամիության և արևմտյան այլ գործընկերների հետ երկկողմ շահավետ կապեր ունենալուց: Այս հարաբերությունները մեկը մյուսին չեն բացառում: Այնպես չէ, որ մեկի օգուտը վնաս է մյուսի համար:

«Նովոստի–Արմենիա» – Հայաստանը բավականին լավ դիրքեր է զբաղեցնում Համաշխարհային բանկի «Doing Business» վարկանիշում, ինչը նախատեսում է շահավետ պայմաններ ձեռներեցության համար։ Սակայն ամերիկացի ներդրողները դեռևս պասիվ են մեր երկրում։ Ի՞նչ քայլեր են հարկավոր ամերիկացի ներդրողներին և գործարարներին Հայաստան ներգրավելու համար։

Ռ. Միլզ – Երկրով ճանապարհորդելիս ԱՄՆ բիզնես ներդրողներից, ինչպես նաև Հայաստանի շարքային քաղաքացիներից ես լսում եմ, որ գործարար տղամարդիկ ու կանայք, երբ փորձում են գումար վաստակել Հայաստանում, մարտահրավերների առաջ են կանգնում: Այդ պատճառով դեսպանատունն աշխատում է Հայաստանի կառավարության հետ՝ բիզնեսի շրջանում արդարացի մրցակցության ապահովման ուղղությամբ: Ցանկանում եմ նաև ընդգծել, որ ներդրումներ ներգրավելու գործում կարևոր դեր ունեն ՀՀ ժողովուրդն ու կառավարությունը: Ընկերությունները ներդնում են այնպիսի երկրներում, որտեղ կա կանխատեսելիություն և թափանցիկություն ցանկացած ոլորտում՝ հարկային, մաքսային կանոնակարգերից մինչև դատական վարույթներ: Թեպետ մենք չենք կարող ստիպել ԱՄՆ գործարարներին մուտք գործել հայկական շուկա, ԱՄՆ դեսպանատունն իր Տնտեսական և կոմերցիոն բաժնի ակտիվ գործունեության միջոցով ներկայացնում է առկա գործարար և առևտրային հնարավորությունները տարեկան կտրվածքով պատրաստվող երկու զեկույցների միջոցով` «Երկրի կոմերցիոն ուղեցույց» և «Ներդրումային միջավայրի մասին տեղեկանք»։

«Նովոստի–Արմենիա» – Հայկական տնտեսության ո՞ր ոլորտները կարող են հետաքրքրել ամերիկացի ձեռներեցներին։

Ռ. Միլզ – Ամերիկացի ներդրողներն արդեն իսկ հետաքրքրված են Հայաստանում առկա հնարավորություններով: Միացյալ Նահանգների և Հայաստանի միջև երկկողմ առևտրաշրջանառությունը 2014թ.–ին կազմել է 153 միլիոն ԱՄՆ դոլար: Ամերիկյան ապրանքների` թռչնամիս, մեքենաներ, տրանսպորտային միջոցներ, օպտիկական և բժշկական սարքավորումներ, ներմուծումը Հայաստան 2014թ.–ին կազմել է 56 միլիոն ԱՄՆ դոլար:

2013 թ.-ին ԱՄՆ արտաքին ուղղակի ներդրումների ծավալը Հայաստանում կազմել է մեկ միլիոն ԱՄՆ դոլար, ինչը կտրուկ աճել է այս տարի ամերիկյան Կոնտուր Գլոբալ ընկերության կողմից Որոտանի հիդրոկասկադի ձեռքբերումից հետո:

2014թ.–ին Հայաստանից ԱՄՆ ներմուծվել են 96 միլիոն ԱՄՆ դոլարի ապրանքներ ՝ ալյումին, հագուստեղեն, կոնյակ, ադամանդ և պահածոյացված միրգ ու բանջարեղեն:

Հայաստանի արտաքին ուղղակի ներդրումների ծավալը Միացյալ Նահանգներում 2013թ.–ին կազմել է 1 միլիոն ԱՄՆ դոլար:

Միացյալ Նահանգները շարունակում են մնալ Հայաստանի կարևոր առևտրային գործընկերներից մեկը: Դրա մասին են վկայում մեր երկրների միջև ամուր, պատմական կապերը՝ տնտեսական, քաղաքական և մշակութային ոլորտներում: 2015 թ.–ին երկրի կոմերցիոն ուղեցույցում որպես բիզնեսի հնարավորության պոտենցիալ ոլորտներ մենք առանձնացրել ենք էներգետիկայի և հանքարդյունաբերության (հետազոտություններ, շահագործում և օժանդակ ծառայություններ), այլընտրանքային էներգետիկայի, ագրոբիզնեսի, տեղեկատվական տեխնոլոգիաների, ինչպես նաև ծառայությունների (մանրածախ առևտուր, ճամփորդություն և տուրիզմ) ոլորտները:

«Նովոստի–Արմենիա» – Դեկտեմբերի 6–ին Հայաստանում կանցկացվի սահմանադրական բարեփոխումների հանրաքվեն, որով նախատեսվում է անցում կատարել խորհրդարանական իշխանավարման։ Ձեր կարծիքով` սա քայլ առա՞ջ է ժողովրդավարության ամրապնդման ճանապարհին։

Ռ. Միլզ – Սահմանադրությունը փոխելու-չփոխելու կամ ինչպես փոխելու որոշումը պատկանում է ՀՀ քաղաքացիներին: Մենք տեսնում ենք համակողմանի և բաց քննարկման անհրաժեշտություն, որը կարտահայտի ամբողջ ազգի տեսակետը: Հանրաքվեի քարոզարշավում ներառական բանավեճը կերաշխավորի սահմանադրության լեգիտիմությունը՝ անկախ հանրաքվեի արդյունքներից: Քարոզարշավի ընթացքում սահմանադրական առաջարկվող փոփոխությունների ընդդիմադիրներին անհրաժեշտ է տրամադրել եթերաժամանակ և իրենց կարծիքներն արտահայտելու լայն և հավասար հնարավորություններ: Կարևոր է, որ հավասարապես լսելի լինեն բոլոր ձայները՝ այո, ոչ կամ որևէ այլ ձայն: Մամուլում վերջին շրջանում տեղ գտած հրապարակումներն այն մասին, որ կրթական, տեղական ինքնակառավարման, առողջապահական պաշտոնյաները չարաշահում են իրենց պաշտոնեական դիրքը՝ պարտադրելով իրենց աշխատակիցներին սատարել առաջարկվող փոփոխություններին, մտահոգիչ էին ինձ համար: Սակայն ես ողջունում եմ վարչապետ Հովիկ Աբրահամյանի հանձնառությունն առ այն, որ պատասխանատվության կենթարկվի ցանկացած պետական պաշտոնյա, ով կփորձի «վարչական ռեսուրսի» կիրառմամբ ազդել դեկտեմբերի 6-ի հանրաքվեի արդյունքների վրա:

«Նովոստի–Արմենիա» – Ղարաբաղյան հակամարտության գոտու իրավիճակը պարբերաբար սրվում է և կարող է դուրս գալ վերահսկողությունից։ Ի՞նչ քայլեր է ձեռնարկում ԱՄՆ–ն` որպես ԵԱԿ ՄԽ համանախագահ–երկիր լարվածությունը թուլացնելու և հակամարտության կարգավորման համար անհրաժեշտ պայմաններ ստեղծելու համար։

Ռ. Միլզ – Թույլ տվեք կրկնել ԵԱՀԿ Մինսկի խմբի ամերիկացի համանախագահ դեսպան Ուորլիքի վերջին շրջանի հայտարարությունները, որտեղ նա մտահոգություն էր հայտնում այս լարվածության վերաբերյալ: Երևան կատարած վերջին այցի ժամանակ նա մասնավորապես ասել էր. «Եթե կողմերը լրջորեն են մոտենում հակամարտության բանակցային կարգավորմանը, ապա պետք է գիտակցեն, որ շփման գծի երկայնքով և միջազգային սահմանին լարվածության սրմամբ դա հնարավոր չի լինի: Մենք պետք է հարգենք հրադադարի ռեժիմը, որպեսզի բանակցությունները հաջողությամբ պսակվեն»:

«Նովոստի–Արմենիա» – Ինչպե՞ս եք գնահատում Հայաստանի դերակատարությունը միջազգային խաղաղապահ առաքելություններում` երկրագնդի վրա խաղաղություն ապահովելու համար։ Վաշինգտոնը շարունակելու՞ է համագործակցել Երևանի հետ այդ ոլորտում։

Ռ. Միլզ – Միջազգային անվտանգության հարցում Հայաստանի առաջատար դերակատարման, մասնավորապես՝ ՆԱՏՕ-ի և ՄԱԿ-ի խաղաղապահ ուժերի կազմում իր հետզհետե ավելացող ու գործուն մասնակցության վերաբերյալ գովեստի բավարար խոսքեր չեմ գտնում: 1994թ.-ից ՆԱՏՕ-ի Գործընկերություն հանուն խաղաղության ծրագրի մասնակից դառնալուց ի վեր` Հայաստանը մշտապես արժանացել է ՆԱՏՕ-ի ղեկավարության գովեստին ու բարձր գնահատականին՝ Կոսովոյում և Աֆղանստանում կարևոր գործողությունների մասնակցության համար: Ողջունելի է նաև կառավարության վերջերս կայացրած որոշումը «Վճռական աջակցություն» առաքելությանը մինչև վերջ մասնակցելու վերաբերյալ, ինչպես նաև մասնակցությունը ՄԱԿ-ի խաղաղապահ գործողություններում՝ Լիբանանում և հավանաբար նաև Մալիում: Հայաստանի մասնակցությունը մատնանշում է, որ վերջինս պատրաստ է միջազգային հանրության հետ աշխատել առավել խաղաղ ու առավել արդարացի աշխարհ կերտելու ուղղությամբ:

«Նովոստի–Արմենիա» – Ի՞նչ դերակատարություն ունի ԱՄՆ–ի հայկական համայնքը մեր երկրների երկկողմ համագործակցության ամրապնդման համար։

Ռ. Միլզ – Միացյալ Նահանգները հպարտանում են հայ-ամերիկյան մեծ և ակտիվ համայնքով, որն իր մեծ ներդրումն է ունեցել ամերիկյան կյանքում, ինչպես նաև Հայաստանի և Միացյալ Նահանգների միջև ամուր կապերի ձևավորման հարցում: Մենք կապի մեջ ենք սփյուռքի մեր գործընկերների հետ` (լինեն դրանք խոշոր կազմակերպություններ, բարեգործական կառույցներ, թե համայնքի ազդեցիկ անդամներ) փոխանակելու կարծիքներ Հայաստանի կարիքների, հայ և ամերիկացի ժողովուրդների միջև կապերի ամրապնդման վերաբերյալ, ինչպես նաև Հայաստանում և տարածաշրջանում իրականացվող ամերիկյան քաղաքականությունը նրանց ներկայացնելու նպատակով: Սփյուռքըն արժեքավոր ռեսուրս է Հայաստանի համար՝ նոր գաղափարների, աջակցության և օգնության աղբյուր: Դեսպանատունը քաջալերում է վերջինիս նման դերակատարումը:–0–
Loading...
Թեմատիկ նյութեր
Բաժնի այլ նյութեր
18:58
15 Նոյեմբերի 2016
«Նոր հայեր». երեխաների պես ուրախանում էինք, որ կարողացել ենք նվաճել ՈՒՀԱ–ի գավաթը
«Նոր հայեր» թիմի անդամ և դերասան Արմեն Պետրոսյանը «Նովոստի-Արմենիա» գործակալությանը տված բացառիկ հարցազրույցում խոսել է այն մասին, թե ինչպես է թիմը նվաճել ՈւՀԱ–ի 55-ամյակի հոբելյանական միջոցառման գավաթը, արդյոք կյանք կա՞ ՈՒՀԱ-ից հետո, և նա պատրա՞ստ է, արդյոք, վարպետության դասեր տալ ՈւՀԱ–ի երիտասարդ հայ անդամներին:
12:05
26 Հոկտեմբերի 2016
Ադրբեջանը սահմանային լարվածության հրահրմամբ վերահաստատում է, որ հակամարտության կարգավորումը տեսնում է միայն ռազմական ուղիով. ՊՆ
ՀՀ ՊՆ տեղեկատվության և հասարակայնության վարչության պետ, գեներալ–մայոր Վարդան Ավետիսյանը «Նովոստի–Արմենիա» գործակալությանը տված բացառիկ հարցազրույցում խոսել է «Ազգ–բանակ» նոր գաղափարախոսության, շփման գծում Ադրբեջանի ԶՈւ–ի ակտիվացման, ինչպես նաև հայ ժողովրդի հայրենասիրական ոգու մասին։
13:37
18 Հոկտեմբերի 2016
Քերոլայն Քոքս. աշխարհը պետք է Ադրբեջանին ագրեսոր ճանաչի
Մեծ Բրիտանիայի Լորդերի պալատի անդամ, նախկին փոխխոսնակ, բարոնուհի Քերոլայն Քոքսը վերջերս հերթական անգամ այցելել է Ղարաբաղ:
17:19
17 Հոկտեմբերի 2016
Իսկանդարյան. կես տարում ոչ մի լուրջ տնտեսական առաջընթաց չի կարող գրանցվել
ՀՀ նորանշանակ վարչապետին որքանո՞վ է հաջողվել պրոֆեսիոնալների կառավարություն ձևավորել, ինչպե՞ս է կառավարությունը պայքարելու մենաշնորհների դեմ, ի՞նչ ակնկալել իշխող ՀՀԿ-ի համագումարից։
18:29
25 Սեպտեմբերի 2016
Հոլիվուդյան հանրաճանաչ Jessica ապրանքանիշի հիմնադիրը ցանկանում է մատնահարդարման դպրոց բացել Հայաստանում
Ամերիկահայ հանրաճանաչ մատնահարդար Ջեսիկա Վարթուխյանը, ով եղունգների և ձեռքերի խնամքի հեղափոխական «Jessica» համակարգի ստեղծողն է,«Նովոստի-Արմենիա» գործակալությանը տված բացառիկ հարցազրույցում ներկայացրել է ոլորտի համաշխարհային միտումները, ինչպես նաև Հայաստանի և հայաստանցի մասնագետների մասին տպավորությունները:
18:24
03 Սեպտեմբերի 2016
Միհրան Հարությունյան. ես գնում էի Ռիո միայն մեկ մտքով` հաղթելու. ուրիշ ոչ մի ելք չէի տեսնում, ոչ մի արդարացում
Ռիոյի ամառային 31-րդ Օլիմպիական խաղերն այլևս պատմություն են:
15:30
04 Օգոստոսի 2016
«Սեգոդնյա նոչյու» ռուսական հայտնի ռոք խումբը ցնցել է արցախյան բեմը
Ստեփանակերտում օգոստոսի 3-ին տեղի ունեցավ ռուսական ամենաճանաչված ռոք խմբերից մեկի` «Սեգոդնյա նոչյու» խմբի երկար սպասված համերգը: Խումբը Ստեփանակերտի բնակիչներին իսկապես անմոռանալի երեկո և վառ զգացումներ պարգևեց`կատարելով իր ամենաճանաչված հիթերը, որոնք արցախցիները դեռ երկար կհիշեն:
11:15
07 Հուլիսի 2016
Մխիթարյանն իր առաջին հարցազրույցն է տվել MUTV-ին (ՏԵՍԱՆՅՈՒԹ)
Հայաստանի ազգային հավաքականի ավագ, կիսապաշտպան Հենրիխ Մխիթարյանն իր առաջին հարցազրույցն է տվել «Մանչեսթեր Յունայթեդի» պաշտոնական ալիքին:
13:51
06 Հուլիսի 2016
Ժողովրդական համերգ Արցախի համար
Ռուսաստանում Արցախի ընկերները միջոցներ են հավաքում Լեռնային Ղարաբաղի Հանրապետության քաղաքներից մեկում հայտնի ռուս երաժիշտների մասնակցությամբ «կենդանի» համերգ կազմակերպելու համար։ Մենք մի քանի հարց ենք տվել նախաձեռնող խմբի ղեկավար, հայտնի հրապարակախոս Դենիս Դվորնիկովին։
18:55
04 Հուլիսի 2016
Մխիթարյան. կցանկանայի մի օր հանդես գալ Զիդանի գլխավորությամբ
Հայաստանի հավաքականի կիսապաշտպան Հենրիխ Մխիթարյանը հարցազրույց է տվել «Marca» պարբերականին, որում պատմել է անգլիական «Մանչեսթեր Յունայթեդ» իր տեղափոխության, բարեգործության ու շատ այլ բաների մասին:
15:35
27 Հունիսի 2016
Դիշդիշյանը երազում է ֆիլմ նկարահանել Ֆրունզիկ Մկրտչյանի մասին և հուսով է «Օսկար» ստանալ «Երկրաշարժ» ֆիլմի համար
Ռուսաստանաբնակ հայ հայտնի պրոդյուսեր, «Mars media entertainment» ընկերության ղեկավար Ռուբեն Դիշդիշյանը «Նովոստի–Արմենիա» գործակալությանը տված բացառիկ հարցազրույցում պատմել է իր երազանքի մասին։
11:43
30 Մայիսի 2016
Իվետա Մուկուչյան. իմ երկրպագուներին շատ չեմ սպասեցնի
«Նովոստի–Արմենիա» գործակալությանը տված բացառիկ հարցազրույցում երգչուհին խոսել է մրցույթի ընթացքում վերապրած իր հույզերի, Արցախի դրոշը ծածանելու մասին, ներկայացրել է իր կարծիքը մրցույթի հաղթողի մասին։