ԵՐԵՎԱՆ, 25 նոյեմբերի. /Նովոստի–Արմենիա/. Նոյեմբերի 23-ին արտակարգ դեպք է տեղի ունեցել Երևանում։
Երեկոյան Ժամը 21։00-ի սահմաններում ոստիկանության Երևան քաղաքի վարչության օպերատիվ կառավարման կենտրոն ահազանգ է ստացվել, որ դիմակավորված 2 անձինք ներս են մտել Արաբկիր 53 փողոցի թիվ 5 տուն, որտեղ կապել են տանտիրոջ ոտքերը և ավազակային հարձակում կատարելով՝ դիմել փախուստի։
Ինչպես հայտնում է
shamshyan.com կայքը, նշված վայր են ժամանել Հայաստանի քննչական կոմիտեի Երևանի քննչական վարչության Արաբկիր վարչական շրջանի քննչական բաժնի քննիչները։
Դեպքի վայրում աշխատել են նաև ոստիկանության փորձաքրեագետն ու շնավարժը։
Պարզվել է, որ նույն օրը, ժամը 20։40-ի սամաններում դիմակավորված անձինք, տեսնելով, որ նշված տան դուռը բաց է, մուտք են գործել ներս, որոնցից մեկը՝ զինված ատրճանակով, բռնություն է կիրառել այնտեղ գտնվող Գայանե Բալյուզյանի նկատմամբ՝ ատրճանակը դնելով քունքին, իսկ մյուս դիմակավորվածը երկաթե ինչ-որ գործիքով հարվածել է նրա եղբոր՝ 47-ամյա Հովհաննես Բալյուզյանի մարմնի տարբեր մասերին և պահանջել գումար, ոսկյա, արծաթյա զարդեր։
Կայքի հաղորդմամբ, ավազակներն աղմուկ են լսել, և, ոչինչ չհափշտակելով, դիմել են փախուստի։
Նոյեմբերի 24-ին ոստիկանության քրեական հետախուզության գլխավոր վարչության աշխատակիցները ստացված օպերատիվ տվյալներն իրացնելով՝ Էրեբունի վարչական տարածքից ավազակային հարձակում կատարելու կասկածանքով գլխավոր վարչություն են բերման ենթարկել Երևան քաղաքի Նիզամու փողոցի բնակիչ, 23-ամյա Սուրեն Կիրակոսյանին և Էրեբունու փողոցի բնակիչ, 19-ամյա Միքայել Մինասյանին։
Ինչպես տեղեկանում ենք կայքի գրառումից, «Հաղթանակ» զբոսայգում հայտնաբերվել են նաև չարագործների թաքցրած դիմակն ու ձեռնոցները։
Փաստի առթիվ հարուցվել է քրեական գործ։ Մ. Մինասյանն ու Ս. Կիրակոսյանը ձերբակալվել են։