Խոշոր ՃՏՊ Լոռու մարզում. 2 երեխա ծայրահեղ ծանր վիճակում են

ԵՐԵՎԱՆ, 5 հունիսի./Նովոստի-Արմենիա/. Խոշոր ՃՏՊ է տեղի ունեցել երկուշաբթի Լոռու մարզում։

Ժամը 16:20-ի սահմաններում Ստեփանավան քաղաքի բնակիչ, 40-ամյա Արտակ Հարույթյունյանն իր վարած Mercedes ավտոմեքենայով ճանապարհի ոլորապտույտ հատվածում դուրս է եկել ճանապարհի երթևեկելի գոտուց, բախվել բետոնե արգելապատնեշներին, այնուհետև կիսակողաշրջված վիճակում հայտնվել ձորակում:

Նրա գահավիժումը կանխվել է երկաթբետոնե խողովակների առկայության շնորհիվ, հայտնում է shamshyan.com կայքը։

Վթարի հետևանքով ավտոմեքենայում գտնվող 5 ուղևորներից 4-ը վիրավորվել են։ Նրանցից երկուսը 2-ը երեխաներ են, ովքեր մարմնական վնասվածքներով տեղափոխվել են Ստեփանավանի բժշկական կենտրոն։


Կայքի հաղորդմամբ, երեխաները գտնվում են ծայրահեղ ծանր վիճակում:

Դեպքի վայր են ժամանել ճանապարհային ոստիկանության 2-րդ սպայական գումարտակի 5-րդ վաշտի 1-ին դասակի ծառայողները, Արտակարգ իրավիճակների նախարարության Փրկարար ծառայության Ստեփանավանի հրշեջ-փրկարարական ջոկատը։

Փաստի առթիվ նյութեր են նախապատրաստվում:

Ոստիկանությունը պարզում է վիրավորների ինքնությունը: -0-