Ռումբի մասին կեղծ ահազանգի հեղինակին գտել են. ԱԱԾ
![Ռումբի մասին կեղծ ահազանգի հեղինակին գտել են. ԱԱԾ Ռումբի մասին կեղծ ահազանգի հեղինակին գտել են. ԱԱԾ](/upload/iblock/0d6/0rezz8jucg4atx274emyo6kd3k7gnsvw.jpg)
Հայաստանի ԱԱԾ-ն պարզել է, թե ով է եղել երեկ կեսօրին Երևանի «Շտապօգնության» Ծառայության կենտրոնական ենթակայանում տեղադրված ռումբի վերաբերյալ կեղծ ահազանգի հեղինակը:
Ինչպես երեքշաբթի տեղեկացնում է ԱԱԾ մամուլի ծառայությունը, կեղծ ահազանգի հեղինակը Մեծ Այրում գյուղի միջնակարգ դպրոցի 11-րդ դասարանի աշակերտ, 16-ամյա Նվեր Մանվելի Լորսաբյանն է:
Հայաստանի ԱԻՆ Փրկարար ծառայության հաղորդագրության համաձայն, ահազանգը ստացվել է նախօրեին՝ 12:58-ի սահմաններում: Դեպքի վայր են մեկնել մեկ մարտական հաշվարկ, փրկարական ուժերի վարչության հատուկ փրկարարական ջոկատի հերթապահ խումբը, ճգնաժամային կառավարման կենտրոնի և փրկարական ուժերի վարչության օպերատիվ խմբերը:
Դեպքի վայրում իրականացվել է «1-03» ծառայության աշխատակիցների տարհանում: Դեպքի վայր ժամանած ՀՀ ԶՈՒ սակրավորների խմբի և Ոստիկանության կինոլոգների իրականացրած շենքի զննության արդյունքում պայթուցիկ սարք չի հայտնաբերվել:
«Փաստի առթիվ նախապատրաստված նյութերը փոխանցվել են Ոստիկանություն»,- նշվում է հաղորդագրությունում:
ՀՀ ԱԱԾ-ն ևս մեկ անգամ զգուշացնում է, որ նման արարքների հեղինակները կբացահայտվեն և կպատժվեն օրենքի ողջ խստությամբ: -0-