Aray խանութների ցանցը ժամանակավորապես չի գործի սեփականատիրոջ մահվան կապակցությամբ

Aray կենցաղային տեխնիկայի ցանցի խանութները  երեք օր չեն գործի սեփականատիրոջ մահվան կապակցությամբ, երկուշաբթի «Նովոստի-Արմենիա» գործակալությանը հայտնեցին ընկերության սպասարկման կենտրոնից:
«Ողջ ցանցի խանութները, սկսած երեկվանից, երեք օր չեն գործի՝ Aray-ի սեփականատիրոջ մահվան կապակցությամբ»,- հայտնեց գործակալության զրուցակիցը:

Միաժամանակ ընկերության ոչ քաղաքային գրասենյակում, ոչ էլ ցանցի խանութներում հեռախոսազանգերին չեն պատասխանում:
Ոստիկանությունը հայտնաբերել է 31-ամյա Արմեն Պետրոսյանի դին նրա «BMW X-5» ավտոմեքենայում, որը կայանել էր Սևան-Երևան մայրուղուց դեպի Կոտայքի մարզի Գետամեջ գյուղ տանող ճանապարհահատվածում: Փաստի առթիվ հարուցվել է քրեական գործ՝ 110-րդ հոդվածի 1-ին մասով (ինքնասպանության հասցնելը սպառնալիքի, դաժան վերաբերմունքի կամ անձնական արժանապատվությունը պարբերաբար նվաստացնելու ճանապարհով անձին անուղղակի դիտավորությամբ կամ անզգուշությամբ ինքնասպանության կամ ինքնասպանության փորձի հասցնելը) և 235-րդ հոդվածի առաջին մասով (ապօրինի կերպով հրազեն, բացի ողորկափող հրազենից, ձեռք բերելը, իրացնելը, պահելը, փոխադրելը կամ կրելը):

Ոստիկանության հաղորդագրության համաձայն, ավտոմեքենայի աջ նստելատեղին դրված սև կաշվե պայուսակում հայտնաբերվել է «Բրաունինգ» ատրճանակ` 53 փամփուշտով, իսկ մեքենայի սրահում` «ՏՏ» ատրճանակի կրակված 1 պարկուճ:

Aray ընկերությունն այսօր էլեկտրոնիկայի և կենցաղային տեխնիկայի վաճառքի գծով հայկական շուկայի առաջատարն է: -0