Հայաստանում 19-ամյա տղան կախվել է ծառից իրենց տան բակում

ԵՐԵՎԱՆ, 10 փետրվարի. /Նովոստի-Արմենիա/. Շիրակի մարզի Փոքր Մանթաշ գյուղում ողբերգական դեպք է տեղի ունեցել։

Ինչպես հայտնում է tert.am կայքը` հղում անելով Ոստիկանության լրատվության ԶԼՄ-ների հետ կապերի բաժնի պետ Էդգար Ջանոյանին, փետրվարի 10-ին՝ ժամը 1:30-ի սահմանում ահազանգ է ստացվել այն մասին, որ ինքնասպանություն է գործել Տ.Գ.-ն:

«Մեկնած օպերատիվ խումբը պարզել է, որ նույն օրը ժամի 01:00-ի սահմանում 1998 թվականին ծնված Տ.Գ.-ն ինքնասպանություն է գործել իրենց տան բակում՝ ծառից կախվելու միջոցով», - ասել է Ջանոյանը՝ հավելելով, որ արտաքին զննությամբ դիակի վրա բռնության հետքեր չեն հայտնաբերվել:

Նշանակվել է դատաբժշկական փորձաքննություն, կատարվում է քննություն:

Փոքր Մանթաշի համայնքապետ Ժիրայր Հակոբյանը պարբերականին ասել է, որ տղան տան կրտսերն է եղել, ապրել է ծնողների ու ավագ եղբոր հետ:

«Տ.Գ.-ն սովորում էր Երևանի գյուղատնտեսական համալսարանում, հեռակա բաժնում: Շատ նորմալ, խելացի ընտանիքի երեխա էր, թե ինչու է նման քայլի դիմել, զարմանալի է»,- ասել է նա ` հավելելով, որ ընտանիքն ապրում է նորմալ պայմաններում: -0-