ԵՐԵՎԱՆ, 2 մարտի. /Նովոստի–Արմենիա/. Հինգշաբթի վանդալիզմի դեպք է գրանցվել Երևանի Էրեբունի վարչական շրջանում։
Shamshyan.com կայքի հաղորդմամբ, արցախյան քառօրյա պատերազմում հերոսաբար հայրենիքի համար կյանքը տված Գրիշա Հարությունյանի անունով տեղադրված հուշաքարն է անհետացել զրուցարանի պատի վրայից։
Ինչպես նշվում է ռեպորտաժում, դա նկատել են Գրիշայի հարազատները, իսկ մայրը`
տիկին Անահիտը, տեղեկացրել է ոստիկանության Էրեբունու բաժին։
Հարևանների խոսքով, զրուցարանը կառուցվել էր 2 նահատակված հերոսների հիշատակին, ովքեր ապրել են այդ շենքում։
«Այսօր առավոտյան իմացանք, որ Գրիշի մայրը նկատել է, որ հուշաքարը պոկել ու տարել են։ Սրան անուն չկա տալու։ Դա վանդալիզմ է, բայց որ հայը նման վանդալիզմի հեղինակ կլինի, դա ներելի չէ։ Հիմա, չգիտենք՝ արդյո՞ք ոստիկանությունը կբացահայտի, բայց, միևնույն է, այն կատարողը կամ կատարողները ոչնչով չեն տարբերվում ազերիներից ու թուրքերից, քանի որ այդ ցեղերին է հարիր վանդալիզմ կատարելու մեծ հակումը»,– հարևանների խոսքն է մեջբերում կայքը։
Գրիգոր Հարությունյանը զոհվել է 2016 թվականի ապրիլի 2-ի գիշերը, երբ կեսգիշերին հակառակորդի դիվերսիոն-հետախուզական խումբը հարձակվել է հայկական կազմի 115 դիրքի վրա, որտեղ Գրիգորն իր ծառայակից ընկերոջ հետ էր միայն:
Հետմահու պարգևատրվել է Հայաստանի Հանրապետության «Արիություն» մեդալով: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում