ԵՐԵՎԱՆ, 7 նոյեմբերի. /Նովոստի–Արմենիա/. Հայաստանի պաշտպանության նախարարության մամուլի քարտուղարը ներկայացրել է չորեքշաբթի Հայաստանի հարավում տեղի ունեցած ՃՏՊ–ի որոշ մանրամասներ:
Ավելի վաղ նա հաստատել էր, որ զինծառայողներ տեղափոխող Հայաստանի ՊՆ բեռնատարը վթարի է ենթարկվել, ինչի հետևանքով
զոհվել է չորս զինծառայող։
«Մեքենայում եղել են 21 զինծառայող, որից 19-ը թափքում: 21-ից 17 զինծառայողի կյանքին վտանգ չի սպառնում, 8-ը ստացել են տարբեր տեսակի մարմնական վնասվածքներ: Բուժզննումը շարունակվում է»,– գրել է Հովհաննիսյանը Facebook–ի իր էջում:
Նա նշել է, որ վիրավորները տեղափոխվում են Սիսիանի հոսպիտալ և Գորիսի ԲԿ:
«Նախնական տեղեկություններով մեկը ունի կոտրվածքներ, ծայրահեղ ծանր վիճակ չկա ոչ մեկի մոտ»,– պարզաբանել է նա։
Ինչպես հայտնում են հայկական պաշտպանական գերատեսչության մամուլի ծառայությունից, վթարը տեղի է ունեղել ժամը 13.00-ի սահմաններում։ N զորամասին պատկանող «Կամազ» մակնիշի ավտոմեքենան Որոտան-Խնձորեսկ ավտոճանապարհի 5-րդ կմ հատվածում դուրս է եկել ճանապարհի երթևեկելի մասից և գլորվել ձորը:
Դեպքի հանգամանքները պարզելու համար կատարվում է քննություն:
«ՀՀ պաշտպանության նախարարությունը խորին ցավակցություն է հայտնում մահացած զինծառայողների ընտանիքների անդամներին, հարազատներին և ծառայակիցներին»,– ասվում է հաղորդման մեջ։ -0-