ԵՐԵՎԱՆ, 1 մարտի. /Նովոստի–Արմենիա/. Չորեքշաբթի արտակարգ դեպք է տեղի ունեցել Արարատի մարզում։
Ժամը 11։00-ի սահմաններում ոստիկանության Արարատի մարզային վարչության և Արտակարգ իրավիճակների նախարարության փրկարար ծառայության օպերատիվ կառավարման կենտրոններ ահազանգ է ստացվել, որ Տափերական գյուղի վարչական տարածքում՝ գնացքի գծերի վրա, 150-ից ավելի սատկած ոչխարներ ու գառներ կան։
Ինչպես հայտնում է shamshyan.com կայքը, նշված վայր են ժամանել ոստիկանության Արարատի մարզային վարչության օպերատիվ խումբը, հրշեջ-փրկարարական ջոկատ։
Ոստիկաններն ու փրկարարները պարզել են, որ ժամը 10։00-10։50-ի սահմաններում բեռնատար գնացքը վրաերթի է ենթարկել գնացքի գծերի վրայով անցնող ոչխարի հոտը, ինչի հետևանքով էլ 140 ոչխար տեղում սատկել է, իսկ մոտ 25 ոչխար էլ վիրավորվել է։
Պարզվել է, որ ոչխարները պատկանում են Արարատի մարզի Լանջազատ գյուղի բնակիչ, սակայն ժամանակավորապես Նորուղի գյուղում բակվող 49-ամյա Ջասմ Խդոյանին։
Դեպքի մասին տեղեկացվել է Արարատի մարզպետ Արայիկ Գրիգորյանին, ում կարգադրությամբ Արարատի մարզպետարանի գյուղատնտեսության և բնապահպանության վարչության պատասխանատուները՝ վարչության պետ Հայկազ Տերտերյանի գլխավորությամբ ժամանել են նշված վայր։
Գյուղացիներն ասում էին, որ գառների տերը վարկով 10 մլն դրամ էր վերցրել բանկից և այն ներդրել էր ոչխարաբուծության մեջ, սակայն հիմա խեղճ գյուղացին չգիտի, թե ով և ինչպես է փոխհատուցելու վնասը։
Այդ ընտանիքը գտնվում է սոցիալապես անապահով վիճակում և նրանք իրենց գոյությունը պահում էին ոչխարաբուծությամբ զբաղվելով։ Կայքի տեղեկություններով, մարզպետը խոստացել է անել ամեն հնարավորը՝ տուժած ընտանիքին սատար կանգնելու համար։
Սատկած ոչխարների մեծ մասը նոր է ծննդաբերել գառնուկներ և նրանց ձագերն էլ չեն ապրի, քանի որ, նրանց կաթ տվող ոչխարները սատկել են։ Կենդանի մնացած, սակայն վիրավոր գառներին արդեն մորթել են, որպեսզի միսը հանձնեն Երևանի կենդանաբանական այգի։
Բեռնատար գնացքի մեքենավարը, ըստ տեղեկությունների, հայտարարել է, թե մառախուղի պատճառով չի նկատել գառներին, իսկ գառները մոտ 1 կմ երկարությամբ ցրիվ են եղած, սատկած ոչխարների մեջ կան ձագով ոչխարներ։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում