Հարբած ոստիկանները քաղաքացու են ծեծել, ոստիկանությունը պարզաբանում է իրավիճակը (ՎԻԴԵՈ)
17:13
07 Հունիսի 2019
ԵՐԵՎԱՆ, 7 հունիսի./Նովոստի–Արմենիա/. ՀՀ ոստիկանությունը հաղորդագրություն է տարածել` պարզաբանելով ԼՀԿ պատգամավոր Գևորգ Գորգիսյանի հայտարարությունն այն մասին, որ երեկ հարբած ոստիկանները քաղաքացու են ծեծել։
«Այսօր Ազգային ժողովում ոստիկանության պետին ուղղված հարցադրում է հնչեցվել գիշերը Դավիթաշենում քաղաքացու հետ կատարված միջադեպի կապակցությամբ, որի վերաբերյալ ոստիկանությունն արդեն իսկ պարզաբանում է տարածել», – նշվում է ոստիկանության հաղորդագրության մեջ:
«Հարկ ենք համարում կրկնել, որ միջադեպի կապակցությամբ, ոստիկանության պետ Վալերիյ Օսիպյանի հանձնարարությամբ, սկսվել է ծառայողական քննություն:
Ինչ վերաբերում է ոստիկանության գործողություններին, ապա նորից հիշեցնենք, որ ոստիկանությունը գործում է օրենքով իրեն վերապահված լիազորությունների շրջանակում և կատարում է իր գործառույթներից բխող գործողություններ», – նշվում է հայտարարության մեջ:
Ոստիկանությունից նաև հիշեցնում են, ոստիկանների աշխատանքում չեն բացառվում նաև վրիպումներն ու թերացումները, «ինչպես և ոստիկանության մեծ ընտանիքին անհարիր անձանց գոյությունը»:
«Առաջին հերթին և բոլորից ավելի ոստիկանությունն է շահագրգռված, որ նման երևույթներն իսպառ բացառվեն կառույցի գործունեության մեջ: Ծառայողական քննության արդյունքներով լիարժեք կբացահայտվեն միջադեպի բոլոր հանգամանքները, և եթե ահազանգի իսկությունը հաստատվի, մեղավորները կենթարկվեն ամենախիստ պատասխանատվության», – նշում են ոստիկանությունից:
Հիշեցնենք, որ այսօր ԱԺ–ում ԼՀԿ պատգամավոր Գևորգ Գորգիսյանը պատմել է երեկ կատարված մի միջադեպի մասին։
«Երեկ գիշերը, քաղաքացին փակել է իր վարձակալած տարածքի դռները, պատրաստվելով տուն գնալ, նրան են մոտեցել երկու սևազգեստ մարդիկ` հարբած, ներկայացել որպես ոստիկան ու կասկածելով, որ մարդը թալանում է այդ տարածքը՝ սկսել են հրելով փորձել մտցնել մեքենան։ Քաղաքացին պահանջել է թղթերը, և իրոք պարզվել է, որ այդ մարդիկ ոստիկաններ են», – նշել է Գորգիսյանը`հավելելով, որ ոստիկանները, ծեծելով և բրդելով մարդուն մտցրել են մեքենան։
«Նրանք շարունակել են ծեծը մեքենայի մեջ, մարդուն հասցրել են ոստիկանական բաժանմունքի մոտ, հանել են մեքենայից, բաժանմունքից դուրս են եկել էլի ոստիկաններ, շարունակել են ծեծել քաղաքացուն, հետո մոտեցել է մի ոստիկան և ճանաչելով քաղաքացուն, ենթադրաբար թաղայինն է եղել, ասել է, որ ճանաչում է այդ մարդուն, նա այդ տարածքի վարձակալն է և ասել են` լավ դե գնա», – ասել է ԱԺ պատգամավորը`պնդելով, որ սա չպետք է անհետևանք մնա։
«Արդեն հաղորդում տվել ենք հանցագործության մասին», – հայտարարել է Գևորգ Գորգիսյանը։–0–
