ԵՐԵՎԱՆ, 14 նոյեմբերի. /Նովոստի–Արմենիա/. ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժնում հարուցվել է քրեական գործ Նորքի ինֆեկցիոն հիվանդանոցից դատապարտյալ Թելման Ալավերդյանի փախուստի դեպքի առթիվ, հաղորդում է ՀՀ ՔԿ մամուլի ծառայությունը։
ՀՀ ԱՆ «Նուբարաշեն» ՔԿՀ-ի դատապարտյալ1987թ. ծնված Թելման Ալավերդյանը, առողջական խնդիրների կապակցությամբ 2017 թ.–ի նոյեմբերի 10–ին տեղափոխվել է Նորքի ինֆեկցիոն հիվանդանոց և պահվել նշված հիվանդանոցի մեծահասակների 5-րդ բաժանմունքի հիվանդասենյակում։
«Նախնական տվյալներով՝ օգտվելով իր նկատմամբ հսկողություն իրականացնող՝ պաշտոնատար անձ հանդիսացող ՀՀ ԱՆ «Նուբարաշեն» ՔԿՀ-ի աշխատակիցների կողմից ծառայության նկատմամբ դրսևորած անփույթ վերաբերմունքից՝ դատապարտյալը հիվանդասենյակի սանհանգույցից օգտվելու պատրվակով նոյեմբերի 14-ին ժամը 04։00-ի սահմաններում մտել է սանհանգույց, ապա դեպի ընդհանուր բաց պատշգամբ դուրս եկող դռնով դիմել փախուստի», – նշվում է գերատեսչության հաղորդագրության մեջ։
Դեպքի առթիվ հարուցվել է քրեական գործ ՀՀ քրեական օրենսգրքի 315-րդ հոդվածի 1-ին (պաշտոնեական անփութությունը) և 355-րդ հոդվածի 1-ին մասերով (փախուստն ազատազրկման վայրից, կալանավորվածներին պահելու վայրից կամ ձերբակալվածներին պահելու վայրից)։
Ձեռնարկվում են անհրաժեշտ քննչական գործողություններ՝ դեպքի բոլոր հանգամանքների բազմակողմանի, օբյեկտիվ և լրիվ հետազոտումն ապահովելու ուղղությամբ։
«Քրեական գործի շրջանակներում իրականացված որոնողական միջոցառումների արդյունքում փախուստի դիմած դատապարտյալը հայտնաբերվել է», – հայտնում է ՀՀ ՔԿ մամուլի ծառայությունը։
ՀՀ ոստիկանությունն իր հերթին տեղեկացնում է, որ ձեռնարկած լայնածավալ օպերատիվ-հետախուզական և որոնողական միջոցառումների արդյունքում փախուստից մի քանի ժամ անց Թելման Ալավերդյանը հայտնաբերվել է Արարատի մարզի Արտիմետ գյուղի տներից մեկում և բերման ենթարկվել ոստիկանության Մարաշի բաժանմունք։
Ալավերդյանը տեղափոխվել է ՀՀ ԱՆ «Նուբարաշեն» քրեակատարողական հիմնարկ։–0–
