Մահվան ելքով վրաերթ Արմավիրի մարզում. 76–ամյա տղամարդը հիվանդանոցի ճանապարհին մահացել է (ՎԻԴԵՈ)

ԵՐԵՎԱՆ, 10 հոկտեմբերի. /Նովոստի–Արմենիա/. Նախօրեին՝ հոկտեմբերի 9-ին, մահվան ելքով վրաերթ է տեղի ունեցել Արմավիրի մարզում:

Shamshyan.com–ի հաղորդմամբ, ժամը 19:00-ի սահմաններում Վաղարշապատի բժշկական կենտրոնից ոստիկանության Վաղարշապատի բաժին ահազանգ է ստացվել, որ մահացած վիճակում իրենց մոտ է տեղափոխվել մի քաղաքացի:

Կայքի տեղեկություններով՝ ոստիկանները պարզել են, որ մահացածին հիվանդանոց է տեղափոխել Երևան քաղաքի Նոր Նորք վարչական շրջանի բնակիչ 31-ամյա Հրանտ Իրիցյանը, ով իր վարած Mercedes մակնիշի ավտոմեքենայով Երևան-Արմավիր ավտոճանապարհին վրաերթի է ենթարկել Պողոս Աթանյանին:

Փաստի առթիվ հարուցվել է քրեական գործ ՀՀ քր օր-ի 242 հոդվածի 2-րդ մասի հատկանիշներով (ճանապարհային երթևեկության անվտանգության ապահովմանն ուղղված պահանջները կամ ճանապարհային երթևեկության կամ տրանսպորտային միջոցների շահագործման կանոնները խախտելը, որն անզգուշությամբ առաջացրել է մարդու մահ): 

Քննիչի հանձնարարականով ավտոմեքենան հիվանդանոցի բակից տեղափոխվել է ոստիկանության Վաղարշապատի բաժնի հատուկ պահպանվող տարածք:–0–