Հայտնի է Մոսկվա Երևան օդանավի սրահում առաջացած ծխի պատճառը (ՎԻԴԵՈ)
14:23
19 Հուլիսի 2019
ԵՐԵՎԱՆ, 19 հուլիսի. /Նովոստի-Արմենիա/. Շերեմետևո օդանավակայանում Nordwind ընկերության օդանավում ծխի առաջացման պատճառ է դարձել օդափոխման համակարգում առկա խափանումները։ Այդ մասին ТАСС-ին հայտնել է ՌԴ քննչական կոմիտեի Մոսկվայի միջտարածքային վարչության ներկայացուցիչ Ելենա Մարկովսկայան:
«Դեպքի վայրում մասնագետների`ավիացիոն տեխնիկների մասնակցությամբ օպերատիվ քննչական խմբի աշխատանքի ժամանակ նախապես սահմանվել է, որ միջադեպի պատճառ է դարձել օդափոխման համակարգ ներս թափանցած հիդրավլիկ հեղուկի և յուղերի գոլորշին, որը հետո ներթափանցել է օդանավի սրահ», - ասել է Մարկովսկայան:
Ըստ նրա, օդանավում չեն հայտնաբերվել այրման և հրդեհի հետքեր, օդանավի մասերը չեն վնասվել: Ուղևորների առողջությանը նույնպես ոչ մի վնաս պատճառված չէ, բուժօգնությանը դիմած քաղաքացիների մոտ բժիշկները չեն հայտնաբերել շնչառական ուղիների խնդիրներ կամ թունավորման նշաններ:
«Պետք է նշել, որ անձնակազմի համակարգված և հմուտ գործողությունների շնորհիվ ուղևորների տարհանումն անցել է նորմալ ռեժիմով: Բոլոր դիմածներին անմիջապես տրամադրվում է հոգեբանական և բժշկական օգնություն», - ասել է վարչության ներկայացուցիչը: Նախաքննական ստուգումը միջադեպի փաստի առթիվ շարունակվում է, դրա արդյունքներով կընդունվի դատավարական որոշում:-0-