ԵՐԵՎԱՆ, 25 օգոստոսի. /Նովոստի–Արմենիա/. Սնանկացած գործարար Արամ Պետրոսյանը, ով չորեքշաբթի պատանդ էր վերցրել Մոսկվայի կենտրոնում գտնվող բանկերից մեկի մասնաճյուղում, առաջին ցուցմունքներն է տվել քննիչներին, հաղորդում է ՌԻԱ Նովոստին։
Ինչպես հաղորդում է ՔԿ Մոսկվայի գլխավոր քննչական վարչության պետի ավագ օգնական Յուլիա Իվանովան, հարցաքննության ժամանակ տղամարդը հայտարարել է, որ չէր պատրաստվում սպանել մարդկանց։
Նրա խոսքով` սնանկացած գործարարը քննիչներին ասել է, որ չէր պատրաստվում սպանել պատանդներին, այլ պարզապես ցանկանում էր ուշադրություն գրավել իր խնդրի նկատմամբ։
Մոսկվայում բանկի մասնաճյուղ գրաված գործարար Պետրոսյանը հանձնվել է ոստիկաններին>>
Իրավապահ մարմինների աղբյուրն ավելի վաղ պարզաբանել է, որ տղամարդը, օրենքի հիման վրա, կարող է խուսափել պատժից։
«Պատանդներ վերցնելու համար ձերբակալվածին ոչինչ չի սպառնում։ Քրեական օրենսգրքում հատուկ կետ կա, որտեղ նշված է, որ անձը, ով ինքնակամ կամ իշխանությունների պահանջով ազատ է արձակել պատանդներին, ազատվում է քրեական պատասխանատվությունից», – նշել է նա։
Նախօրեին երեկոյան գործարար Արամ Պետրոսյանը պատանդ էր վերցրել չորս մարդու Մոսկվայի կենտրոնում գտնվող «Սիթիբանկի» մասնաճյուղում` սպառնալով պայթեցնել մասնաճյուղը։ Նրա վզին դեղին կպչուն ժապավենով փաթաթված տուփ է եղել։ Հետագայում պարզվել է, որ դա մուլյաժ է, և տուփի մեջ աղ է լցված։
Բանակցությունների ընթացքում, որին մասնակցել է նաև Մոսկվայի ոստիկանապետ Անատոլի Յակունինը, ձեռներեցը պահանջել է, որպեսզի իրեն ցուցադրեն դաշնային հեռուստաալիքներով։
Մի քանի ժամ անց, բաց թողնելով բոլոր պատանդներին, Պետրոսյանը հանձնվել է։
Քրեական գործը հարուցվել և քննվում է ՌԴ ՔՕ 206–րդ հոդվածի հատկանիշներով («Պատանդ վերցնելը»)։ Աղբյուրների կարծիքով, սակայն, հաշվի առնելով այն, որ Պետրոսյանը հանձնվել է և բաց է թողել բոլոր պատանդներին, մեղադրանքը կարող ` վերաորակավորվել ՌԴ ՔՕ 127–րդ հոդվածի հատկանիշներով («Ազատությունից ապօրինի զրկելը»)։
Հայտնի է, որ որոշ ժամանակ առաջ Պետրոսյանը բիզնեսի հետ կապված խնդիրներ է ունեցել, նա մեծ պարտքեր է կուտակել։ Տղամարդը սկսել է կանոնավոր կերպով դիմել պետական իշխանության մարմիններին` ձեռներեցներին աջակցող տարբեր նախաձեռնություններով։ –0–
