ՀՀ ոստիկանությունն ուսումնասիրում է Երևանի կենտրոնում գրանցված միջադեպի տեսանյութերը

ԵՐԵՎԱՆ, 14 սեպտեմբերի. /Նովոստի–Արմենիա/. ՀՀ ոստիկանությունն ուսումնասիրում է Երևանի «Թուֆենկյան» հյուրանոցային համալիրի մոտակայքում գրանցված միջադեպի տեսանյութերը, հաղորդում է «Նովոստի–Արմենիա» գործակալության աղբյուրը, որը գտնվում է հյուրանոցի ներսում։


«Թուֆենկյան» հյուրանոցի մուտքի մոտ հինգշաբթի հնչեցին կրակերթեր։ Ականատեսների խոսքով, կրակահերթերն արձակվել են ինքնաձիգից և ատրճանակից փողոցով անցնող մեքենայից։ Միջադեպի հետևանքով մեկ մարդ մահացել է, ևս մեկ մարդ վիրավոր է։

Ինչպես հաղորդում է «Նովոստի–Արմենիա» գործակալության թղթակիցը, միջադեպի տարածքը շղթայված է 30 մետր շառավղով։ Դեպքի վայրում են բարձրաստիճան ոստիկաններ, այդ թվում` ՀՀ փոխոստիկանապետ Հունան Պողոսյանը։

Դեպքի վայրում են նաև ոստիկանության քրեական հետախուզության գլխավոր վարչության պետ Սամվել Ասատրյանը, ոստիկանության կազմակերպված հանցավորության դեմ պայքարի (6-րդ) գլխավոր վարչության պետի առաջին տեղակալ Ալիկ Մարգարյանը, Երևանի ոստիկանապետ Սարգիս Մարտիրոսյանը, Ոստիկանության Կենտրոնական բաժնի պետ Արամ Հովհաննիսյանը։

Ընթանում են օպերատիվ քննչական գործողություններ։–0–