ԵՐԵՎԱՆ, 23 սեպտեմբերի. /Նովոստի-Արմենիա/. 38-ամյա կնոջ սպանության դեպքի առթիվ ՀՀ քննչական կոմիտեի Արմավիրի մարզային քննչական վարչությունում քննվող քրեական գործով մեղադրանք է առաջադրվել կնոջ ամուսնուն, հաղորդում է ՀՀ ՔԿ մամուլի ծառայությունը։
ՀՀ ոստիկանության
հաղորդմամբ, սեպտեմբերի 19-ին 38–ամյա Նարինե Դանիելյանի` բռնության հետքերով մարմինը հայտնաբերվել է Արմավիրի մարզի Ակնալիճ–Զարթոնք ավտոճանապարհին։ Անցկացված միջոցառումների արդյունքում պարզվել է, որ սեպտեմբերի 19–ին ժամը 22։00–ի սահմանում խանդի հողի վրա ծագած վեճի ժամանակ 46–ամյա Արթուր Մ.–ն, ծեծելով սպանել է կնոջը:
ՔԿ–ի հաղորդմամբ, դեպքի վայր մեկնած քննչական-օպերատիվ խումբը նշված վայրում` դիակից մոտ 80 մետր հեռավորության վրա գտնվող «Ford Transit» մակնիշի ավտոմեքենայի մեջ, հայտնաբերել է մի տղամարդու, ով հայտարարել է, որ տուժածն իր կինն է, և ինքն է սպանել նրան։
Նախնական քննության տվյալներով, ամուսինները Երևանի բնակիչներ են, ովքեր դեպքի օրը հյուր էին գնացել Արարատի մարզ։ Վերադարձի ճանապարհին նրանց միջև սկսվել է վիճաբանություն՝ ամուսնական անհավատարմության հարցի շուրջ, որի ընթացքում ամուսինը բռնություն է կիրառել կնոջ նկատմամբ՝ հարվածներ հասցնելով նրա մարմնի տարբեր հատվածներին, ապա, սեղմելով պարանոցը, շնչահեղձ է արել։
Մահվան վկայականի համաձայն՝ կինը մահացել է մեխանիկական շնչահեղձության հետևանքով։
Ձեռք բերված ապացույցների հիման վրա` ամուսնուն սեպտեմբերի 22-ին մեղադրանք է առաջադրվել ՀՀ ՔՕ 104-րդ հոդվածի 1-ին մասով (սպանություն) և հարցաքննվել դեպքի շուրջ։
Նախաքննությունը շարունակվում է։ Կատարվում են անհրաժեշտ քննչական գործողություններ՝ դեպքի բոլոր հանգամանքների բազմակողմանի, օբյեկտիվ և լրիվ հետազոտումն ապահովելու ուղղությամբ, նշանակվել են դատաբժշկական և դատակենսաբանական փորձաքննություններ: -0-