ԵՐԵՎԱՆ, 9 հոկտեմբերի. /Նովոստի-Արմենիա/. Նախօրեին խոշոր ավտովթար է տեղի ունեցել Արարատի մարզում։
Ինչպես հաղորդում է shamshyan.com կայքը, ժամը 20։40-ի սահմանում Մխչյան գյուղի Արտաշատյան խճուղի և Խանջյան փողոցների խաչմերուկում Գեղարքունիքի մարզի Գավառ քաղաքի բնակիչ 26-ամյա Գևորգ Թոռչյանը, իր վարած «Ford» մակնիշի քարշակով, որի վրա եղել է Գեղարքունիքի մարզի Գավառ քաղաքի բնակիչ 62-ամյա Հակոբ Միրիբյանին պատկանող «ՎԱԶ 2106» մակնիշի ավտոմեքենան, բախվել է Երևան քաղաքի Նորագավիթ 1-ին փողոցի բնակիչ 24-ամյա Սպարտակ Բազեյանի վարած «ՎԱԶ 21099» համարանիշի ավտոմեքենային:
Վերջինը բախվել է նաև էլեկտրասյանը։ Ըստ նախնական տեղեկությունների՝ էլեկտրական հոսանքի լարերը միացել են իրար և առաջացել է կայծ, որից բռնկվել է էլեկտրասյան վրայի արագիլների բույնը և, ընկնելով մեքենաների վրա, առաջացել է հրդեհ, ինչի հետևանքով 3 մեքենաներն էլ վերծվել են մոխրակույտի։
Դեպքի վայր են ժամանել Ճանապարհային ոստիկանության աշխատակիցները, ՀՀ Արտակարգ իրավիճակների նախարարության փրկարար ծառայության Արտաշատի փրկարարական ջոկատը՝ 2 մարտական հաշվարկով, ովքեր մարել են մոխրակույտի վերածված մեքենաների հրդեհը։
Ըստ նախնական տեղեկությունների՝ վթարի հետևանքով բարեբախտաբար զոհեր և վիրավորներ չկան։ Կայքի հաղորդմամբ, առաջացած հրդեհից վնասվել է Մխչյան գյուղի բնակիչ Ռոբերտ Մաթևոսյանին պատկանող մթերային խանութը։ -0-
