Դալայ-լաման կոչ է արել ուսումնասիրել տարբեր կրոնական ավանդույթները
![Դալայ-լաման կոչ է արել ուսումնասիրել տարբեր կրոնական ավանդույթները Դալայ-լաման կոչ է արել ուսումնասիրել տարբեր կրոնական ավանդույթները](/upload/iblock/767/u4prfxnbmz3qv40abd9wsvxeotqqg2im.jpg)
Դալայ-լամա XIV-ը կոչ է արել տարբեր դավանանքների հետևորդներին՝ ուսումնասիրել այլ կրոնական ավանդույթները և նրանց կողմից առաջարկվող՝ «սիրո» և ինքնակարգապահության դաստիարակման միջոցները՝ երկրագնդի վրա կրոնական խտրականությունը և կրոնի հիման վրա բռնությունը կանխելու նպատակով:
«Կարծում եմ, որ կրոնների միջև ներդաշնակ հարաբերությունների հաստատման համար հարկավոր է ուսումնասիրել այլ կրոնական ավանդույթները: Ուսումնասիրել նրանց կողմից առաջարկվող միջոցները՝ սիրո, կարեկցանքի, ներելու ունակության, հանդուրժողականության, ինքնակարգապահության դաստիարակման համար: Եթե դուք ավելի շատ ուսումնասիրեք այլ ազգերի ավանդույթները, ապա կտեսնեք, որ նրանք շատ ընդհանուր բան ունեն», - ասել է Դալայ-լաման Դհարամսալում գտնվող իր նստավայրում «ՌԻԱ Նովոստիին» տված հարցազրույցի ժամանակ, որտեղ նա 1,5 հազար ռուսների խնդրանքով տարբեր երկրների ավելի քան 7 հազար բուդդիստների համար վարպետության դասեր է վարել:
Նրա խոսքերով՝ երբ տարբեր դավանանքի մարդիկ տեսնում են, որ իրենց կրոնները միավորում են նույնանման արժեքներ, ապա նրանց մոտ փոխադարձ հարգանք է առաջանում, նրանք սկսում են ինչ-որ բան սովորել միմյանցից: Իսկ մեկուսացված վիճակում անվստահություն է առաջանում: «Եվ այդ ժամանակ որոշ մարդիկ կարող են օգտագործել կրոնը՝ սեփական քաղաքական կամ տնտեսական հավակնությունները կյանքի կոչելու նպատակով», - նշել է Դալայ-լաման:-0-