IBF վարկածով թեթևագույն քաշում բռնցքամարտի նախկին չեմպիոն Վիկ (Վախթանգ) Դարչինյանը 12-րդ ռաունդում տեխնիկական նոկաուտով հաղթել է 28-ամյա ֆիլիպինցի Ֆեդերիկո Կատուբեյին, հաղորդում է Allboxing.ru կայքը։
Մենամարտը տեղի է ունեցել անցյալ շաբաթ օրը՝ Սիդնեյ քաղաքում։
Մենամարտի հենց սկզբից Դարչինյանն իր ձեռքն է վերցրել նախաձեռնությունը, բայց սկզբում նրա հզոր հարվածները հաճախ նպատակակետին չեն հասել։ 7-րդ և 11-րդ ռաունդներում Կատուբեյը նոկդաունի է ենթարկվել, իսկ 12-րդ ռաունդում, մենամարտի ավարտից մեկ րոպե առաջ, մրցավար Գերի Դինը վճռել է դադարեցնել մենամարտը։
«Դժվար մենամարտ էր։ Հակառակորդն ուժեղ էր, և դա լավ է, քանի որ հիմա ես կարողանում եմ սովորել իմ սխալների վրա»,-ասել է Դարչինյանը մենամարտից հետո։
«Ես ուրախ եմ իմ հաղթանակի համար և կցանկանայի վերադարձնել չեմպիոնի իմ տիտղոսը, բայց Դոների հետ ռևանշը դեռևս հեռու է իրական լինելուց։ Եվ այդ հարցը լուծելը իմ մենեջերի խնդիրն է»,-հայտարարել է բռնցքամարտիկը։
Իր հաջորդ մենամարտը Դարչինյանը կանցկացնի դեկտեմբերի 1-ին ԱՄՆ-ում՝ բռնցքամարտի մեծ շոուի շրջանակներում, որտեղ մարտերից մեկի ժամանակ ռինգ է դուրս գալու նաև Դարչինյանին հաղթած ֆիլիպինցի Նոնիտո Դոները։ Նա IBF թեթևագույն քաշում իր տիտղոսը պաշտպանելու է պարտադիր հավակնորդ մեքսիկացի Լուիս Մալդոնադոյի հետ մենամարտում։
Այժմ Դարչինյանը հանդես է գալիս առաջին թեթևագույն քաշում, և ավստրալական ԶԼՄ-ների տեղեկատվության համաձայն, ցանկանում է մենամարտել այդ քաշում IBF նորաթուխ չեմպիոն ռուս Դմիտրի Կիրիլովի հետ։
Վիկ (Վախթանգ) Դարչինյանը ծնվել է Հայաստանում, 2001թ.-ից պրոֆեսիոնալ բռնցքամարտում հանդես է գալիս Ավստրալիայի դրոշի ներքո։ Նա ծնվել է 1976թ.-ին Վանաձորում։ Արժանացել է «Կատաղի ցուլ» մականվանը։–0--