ԵՐԵՎԱՆ, 2 սեպտեմբերի./Նովոստի–Արմենիա/. Վրաստանի վարչապետ Մամուկա Բախտաձեն այսօր հայտարարել է հրաժարականի մասին, հաղորդում է ՏԱՍՍ–ը։
«Ինձ համար մեծ պատիվ և միաժամանակ մեծ պատասխանատվություն էր ծառայել մեր երկրի շահերի պաշտպանությանը Վրաստանի վարչապետի պաշտոնում։ Ես եղել և շարունակելու եմ լինել «Վրացական երազանք» կուսակցության անդամ և մեր երկրի հավատարիմ զինվորը», – գրել է Բախտաձեն Facebook–յան իր էջում։
Նա շնորհակալություն է հայտնել իր նախորդին` Գեորգի Կվիրիկաշվիլուն վարչապետի պաշտոնում կատարած աշխատանքի համար, ինչպես նաև հաջողություն է մաղթել կառավարության ապագա ղեկավարին։ Բախտաձեն խոստացել է, որ ժամը 15։00–ին լրատվամիջոցների ներկայացուցիչների հետ նախատեսված իր զրույցում ավելի մանրամասն կխոսի հրաժարականի պատճառների և վարչապետի պաշտոնում կատարած աշխատանքի մասին։
Բախտաձեն զբաղեցրել է Վրաստանի վարչապետի պաշտոնը 2018թ.–ի հունիսին։ Մինչ այդ նա զբաղեցրել է Վրաստանի ֆինանսների նախարարի պաշտոնը։
Վրաստանի Սահմանադրության համաձայն, վարչապետի հրաժարականից հետո կառավարության ողջ կազմն ավտոմատ կերպով հրաժարական է տալիս, և նախարարները կատարում են իրենց պարտավորությունները մինչև ԱԺ–ի կողմից նոր վարչապետի ու կառավարության կազմի հաստատումը։ Դրա համար օրենսդիր մարմինն ունի երկու շաբաթ։ Բախտաձեի իրավահաջորդը դեռ հայտնի չէ, սակայն վրացական ԶԼՄ–ները նշում են, որ Վրաստանի նոր վարչապետը կդառնա փոխվարչապետ, ՆԳ նախարար Գեորգի Գախարիան։–0–