ԵՐԵՎԱՆ, 24 հունիսի. /Նովոստի–Արմենիա/. Հանրային ծառայությունները կարգավորող հանձնաժողովը (ՀԾԿՀ) ուրբաթ նիստի ժամանակ հաստատել է էլեկտրաէներգիայի նոր սակագինը սպառողների համար։
«ԱՌԿԱ» գործակալության հաղորդմամբ` ՀԾԿՀ–ն սեփական նախաձեռնությամբ սկսել է էլեկտրաէներգիայի գործող սակագների վերանայման գործընթացը` հաշվի առնելով էլեկտրաէներգիայի արտադրության, արտահանման և ներկրման, ինչպես նաև «Գազպրոմ Արմենիա» ՓԲԸ–ի կողմից ջերմակայաններին վաճառվող բնական գազի սակագների փոփոխության միջև սպասվող հավասարակշռությունը։
Ինչպես, հարցը ներկայացնելիս, նշեց ՀԾԿՀ Սակագնային քաղաքականության վարչության պետ Գարեգին Բաղրամյանը, հայ սպառողների բոլոր կատեգորիաների համար էլեկտրաէներգիայի ցերեկային և գիշերային սակագինը կնվազի 2,58 դրամով։
Հանձնաժողովի ներկայացրած հաշվարկների համաձայն` բնակչության համար էլեկտրաէներգիայի ցերեկային սակագինը (7.00–ից մինչև 23.00–ն) նվազում է` 48,78 դրամից դառնալով 46,2 դրամ (5,3 տոկոսով), գիշերային սակագինը` 38,78 դրամից դառնալով 36,2 դրամ (6,7 տոկոսով) մեկ կՎտ/ժ–ի դիմաց։
«Հաշվի առնելով ՀԵՑ–ի իրականացված ներդրումները, ինչպես նաև նախորդ տարի բարձրացված սակագնի կիրառումը` ստացված շահույթի հաշվին ընկերությունը կարող էր սակագինը նվազեցնել 5,3 դրամով։ Սակայն, հաշվի առնելով այլ գործոնները, որոնք ազդում են վերջնական սակագնի վրա, այդ թվում` արտադրված էլեկտրաէներգիայի արժեքի 2,74 դրամով ավելացումը, սպառողների համար վերջնական սակագինը հաջողվել է նվազեցնել միայն 2,58 դրամով», – ասաց Բաղրամյանը։
Նա նաև նշեց, որ սակագինը հաշվարկելիս հաշվի են առնվել էլեկտրաէներգիայի արտադրության սպասվող ծավալները, վերանորոգման և վերալիցքավորման նպատակով հայկական ԱԷԿ–ի աշխատանքի սպասվող դադարեցումը (120 օրով` սովորական 45 օրվա փոխարեն), ինչպես նաև «Բարձրավոլտ էլեկտրացանցեր» ընկերության կողմից իրականացվող վարկային ծրագրերը, որոնք ուղղված են Իրան և Վրաստան տանող բարձրավոլտ էլեկտրահաղորդալարերի շինարարությանը։
Նոր սակագներն ուժի մեջ կմտնեն օգոստոսի 1–ից։
Ինչ վերաբերում է բնակչությանը մեկ տարի առաջ բարձրացված սակագնի փոխհատուցումների վճարման հարցին, ինչպես նշեց Բաղրամյանը, համապատասխան որոշումն ընդունում է կառավարությունը։
ՀՀ կառավարությունն ու «Տաշիր» բարեգործական հիմնադրամը 2015 թ.–ի օգոստոսի 1–ից մինչև 2016 հուլիսի 31–ը հավասար սկզբունքներով բնակչությանն ու ՓՄՁ–ներին փոխհատուցում են էլեկտրաէներգիայի սակագնի բարձրացումը։ Սակագնի բարձրացման որոշումն ընդունվել է ՀԾԿՀ–ի կողմից նախորդ տարվա հունիսի 17–ին, ինչը հանգեցրեց բողոքի մեծ ալիքի Երևանում և երկրի մի շարք քաղաքներում։ –0–