ԵՐԵՎԱՆ, 27 նոյեմբերի. /Նովոստի–Արմենիա/. Աստվածամուխ սուրբ գեղարդը, որով խոցվեց Հիսուս Քրիստոսի կողը, շաբաթ օրը կցուցադրվի Մայր Աթոռ Սուրբ Էջմիածնում, ասաց Մայր Աթոռի ձեռագրատան, արխիվի և թանգարանների տնօրեն Տեր Ասողիկ քահանա Կարըապետյանը։
«Նոյեմբերի 28–ի առավոտյան գեղարդը գանձարանից կտեղափոխվի տաճար։ Նախորդ տարվանից դա ավանդույթ է դարձել. Սուրբ գեղարդի ուխտի օրը, Սուրբ առաքյալներ Թադեոս և Բարդուղիմեոսի հիշատակի օրը թույլատրել հավատացյալներին դիպչել այդ մեծագույն մասունքին», – ուրբաթ ասուլիսի ժամանակ ասաց Կարապետյանը։
Նրա խոսքով` Հայ առաքելական եկեղեցին դարեր շարունակ պահել է այդ մեծագույն քրիստոնեական մասունքը։
Առաջին դարի սկզբին առաքյալ Թադեոսը գեղարդը տեղափոխել է Հայաստան։ XII դարից այն պահվել է Այրիվանքում, որն այնուհետև վերանվանվել է Գեղարդավանք։ Միջնադարում արշավանքների հետ կապված սպառնալիքների պատճառով գեղարդը տեղափոխվել է Մայր Աթոռ Սուրբ Էջմիածին։
«Այն ոչ միայն մեծագույն, այլ նաև հրաշագործ մասունք է։ Այդ գեղարդի օգնությամբ բազմիցս դադարեցվել են ժանտախտի համաճարակները։ Մենք հավատում ենք, որ գեղարդը բժշկում է հավատացյալների ինչպես հոգին, այնպես էլ մարմինը», – ասաց քահանան։
Նա նշեց, որ մասունքի նկատմամբ հետաքրքրությունը շատ մեծ է։ Երբ գեղարդը ցուցադրվում է տաճարում, առավոտից մինչև ուշ երեկո չի դադարում հավատացյալների հոսքը, ովքեր ցանկանում են հաղորդակից լինել դրան։
«Մենք առաջարկել ենք տուրիստական գործակալություններին Սուրբ առաքյալներ Թադեոս և Բարդուղիմեոսի հիշատակի օրը ներառել կրոնական տուրիզմի փաթեթներում։ Չէ՞ որ ամեն տարի աշխարհում 300 մլն մարդ ճանապարհորդում է կրոնական նպատակներով», – ասաց Կարապետյանը։
Հիսուսին խաչելուց հետո հռոմեացի զինվորներից մեկը տեգով (Գեղարդով) խոցել է խաչի վրա մահացած Հիսուսի կողը, որից «իսկույն արյուն և ջուր ելավ» (Հովհաննես 19.33–34 թվականներ)։ Այդ օրվանից մահվան զենքը՝ Գեղարդը, դարձել էքրիստոնյաների համար սրբազան մասունք։ Հայ եկեղեցու ավանդության համաձայն, Գեղարդ 33 թվականին Հայաստան է բերել Թադեոս առաքյալը, և երկար ժամանակ այն պահվել է քրիստոնյա համայնքներում։ 301 թվականին, երբ Հայաստանում քրիստոնեությունը պետական կրոն է հռչակվել, Գեղարդը դարձել է Հայ եկեղեցու սեփականությունը։ Հիշատակություններ կան, ըստ որոնց, Հայաստանում կամ հարևան երկրներում օգտվել են Սուրբ Գեղարդից՝ երկիրը և ժողովրդին օրհնելու, պատերազմից, աղետներից ազատելու համար։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում