ԵՐԵՎԱՆ, 17 մայիսի. /Նովոստի–Արմենիա/. «Եվրատեսիլ 2016»–ի արդյունքները չեն վերանայվի։ Այս մասին նշվում է մրցույթի Facebook–յան պաշտոնական էջում։
Այս տարի մրցույթում հաղթել է Ուկրաինան ներկայացնող Ջամալան։
«Ուկրաինան «Եվրատեսիլ 2016» մրցույթի հաղթողն է», – նշվում է հաղորդագրության մեջ։
Երևանի բնակիչ Արթուր Հովհաննիսյանը Change.org կայքում հայցադիմում է հրապարակել` պահանջելով վերանայել մրցույթի արդյունքները։ Երևանի ժամանակով ժամը 19։00–ի դրությամբ հայցադիմումի տակ ստորագրել է ավելի քան 300 հազար մարդ։
«Եվրատեսիլի» կազմակերպիչը կուսումնասիրի մրցույթի արդյունքների վերանայման հայցադիմումը>>
Հայցադիմումի տակ իրենց մեկնաբանություններն են գրել Սերբիայի, Խորվաթիայի, Գերմանիայի, Ռուսաստանի, Հունաստանի, Մեծ Բրիտանիայի, Ուկրաինայի, Իսպանիայի, Մալթայի և այլ երկրների բնակիչները։
Ուկրաինան ներկայացնող 32–ամյա Ջամալան հաղթել է «Եվրատեսիլ 2016» մրցույթում` հավաքելով 534 միավոր։ 12 միավոր երգչուհին արժանացել է Վրաստանի, Դանիայի, Մոլդովայի, Լատվիայի, Իսրայելի, Սան Մարինոյի, Բոսնիա և Հերցեգովինայի, Սերբիայի, Մակեդոնիայի, Լեհաստանի և Սլովենիայի միջազգային ժյուրիի կողմից։
Հայաստանը ներկայացնող Իվետա Մուկուչյանը մրցույթում զբաղեցրել է 7–րդ տեղը` հավաքելով 249 միավոր։ –0–