ԵՐԵՎԱՆ, 21 փետրվարի. /Նովոստի-Արմենիա/. Կկասեցվի տնտեսվարող այն սուբյեկտների գործունեությունը, որոնք պարբերաբար կխախտեն կաթնամթերքի պարտադիր մակնշման և սննդային անվտանգության չափանիշների պահանջները։ Այս մասին հինգշաբթի ասաց Սննդամթերքի անվտանգության պետական ծառայության Սննդամթերքի անվտանգության և որակի վերահսկողության տեսչության պետ Վահե Դանիելյանը կաթնամթերքի արտադրողների հետ հանդիպմանը։
«Բացի մթերքի մակնշման խնդրից, արտադրողների առջև կանգնած է կաթի գնման կազմակերպման խնդիր` հաշվի առնելով դրա քիմիական կազմը, դրանում վտանգավոր տարրերի բացառումը, ինչպես նաև մանրէաբանական ֆոնի վերահսկողությունը և ԳՄՕ առկայությունը։ Պաստերիզացնելով կաթը` որոշ արտադրողներ անտեսում են տեխնիկական անվտանգությունը կամ գործընթացը սխալ են կատարում։ Ծառայությունն այսուհետ ավելի խիստ կվարվի նմանատիպ խախտումների հետ»,– ասաց նա։
ԵՏՄ նոր կանոնակարգին համընթաց
Ինչպես նշեց տեսչության պետը, ԵՏՄ–ի` 2019 թվականի հունվարի 29–ից ուժի մեջ մտած մակնշման նոր պահանջներին համապատասխան, տեղական արտադրողները պարտավորվում են հստակ նշել կաթնամթերքի ծագումը և դրանում կաթի փոխարինիչների մասնաբաժինը։
ԵՏՄ–ի նոր տեխնիկական կանոնակարգի համաձայն, կաթնամթերքի արտադրողներին չի կարելի պիտակի վրա նշել, օրինակ, «կաթ», եթե մթերքը պարունակում է փոխարինիչներ։ Պիտակների վրա պարտադիր կարգով պետք է նշված լինի` «պարունակում է բուսական յուղեր»։ Կամ «թթվասերի տեխնոլոգիայով արտադրված կաթ պարունակող մթերք` կաթնաճարպի փոխարինիչով»»,– ասաց նա։
Դանիելյանն ընդգծեց, որ նոր կանոնակարգը չի ենթադրում կաթի փոխարինիչների և բուսայուղի օգտագործման որևէ արգելք, սակայն դրանց թույլատրելի մասնաբաժինը մթերքում չպետք է գերազանցի 49 տոկոսը։
Загружается новость ... "Лево"
Ներկրու՞մ, թե՞ տեղական արտադրանք
Հայաստանի գիտության ազգային ակադեմիայի բնապահպանական–նոոսֆերիկ հետազոտությունների կենտրոնի սննդային շղթաների ռիսկի գնահատման դեպարտամենտի ղեկավար Դավիթ Պիպոյանը երկրի սոցիալ–տնտեսական իրավիճակը համարեց տեղական արտադրանքի անվտանգության և որակի վրա ազդող կարևորագույն գործոն։
Փորձագետի խոսքով, սպառողները հաճախ գիտակցաբար են գնում ցածրորակ կաթնամթերք, քանի որ չեն կարող իրենց թույլ տալ որակյալ, բայց թանկ ապրանք։
«Նոր պահանջներին համապատասխան չոր կաթի պարունակությամբ մթերքները մակնշվում են որպես «վերականգնված» կաթ պարունակող։ Հաճախ սպառողը չգիտի այդ ձևակերպման նշանակությունը։ Չնայած, որ ավելի շատ արտադրողներ են ճշգրիտ մակնշում իրենց ապրանքը, սպառողի իրազեկվածության աստիճանը դրանից չի բարձրանում»,– ասաց նա։
Լրագրողները Հայաստանի կառավարությանն առընթեր սննդամթերքի անվտանգության տեսչական մարմնի ղեկավար Գեորգի Ավետիսյանից հետաքրքրվեցին տեղական շուկայում կաթնափոխարինիչներով արտադրանքի մասնաբաժնի մասին։
«Տեղական շուկայում կաթի փոխարինիչների վերաբերյալ պաշտոնական տվյալներ չկան, քանի որ որևէ լաբորատոր կամ այլ հետազոտություններ չեն կատարվում։ Այդ հարցով պետք է զբաղվի կամ Պետական եկամուտների կոմիտեն, կամ Տնտեսական մրցակցության պաշտպանության պետական հանձնաժողովը։ Հենց նրանք պետք է պարզեն, թե որքան չոր կաթ է գնվում, որքան` բնական»,– ասաց նա։ -0-
