ԵՐԵՎԱՆ, 9 նոյեմբերի. /Նովոստի Արմենիա/. ՀՀ վարչապետ Կարեն Կարապետյանը կհանդիպի տարկետման սահմանափակման դեմ բողոքող ուսանողների հետ։
«Զինվորական ծառաության և զինծառայողի կարգավիճակի» մասին օրինագծով նախատեսվում է սահմանափակել տարկետման իրավունքը պետպատվերով սովորող ուսանողների համար։
Հոկտեմբերի 27–ին Հայաստանի խորհրդարանն առաջին ընթերցմամբ ընդունեց այդ նախագիծը։ Այն դարձել է հասարակական դժգոհության ալիքի պատճառ։
Վարչապետի ավագ օգնական Արամ Վարդևանյանը պայմանավորվածություն է ձեռք բերել ուսանողների հետ, որ «Հանուն գիտության զարգացման» նախաձեռնության հինգ ներկայացուցիչներ կհանդիպեն Կարեն Կարապետյանի հետ, ինչից հետո կառավարության մամուլի ծառայությունը հայտարություն կտարածի հանդիպման և ձեռք բերված պայմանավորվածությունների մասին։
«Հանուն գիտության զարգացման» նախաձեռնության ներկայացուցիչ Դավիթ Պետրոսյանը ավելի վաղ դիմել է ՀՀ վարչապետին և խնդրել է նրան կարծիք հայտնել այդ օրինագծի մասին, ինչպես նաև խնդրել է հանդիպում անցկացնել։
Загружается новость ...
"Право"
«Մենք աստեղ ենք եկել, որպեսզի մեր մտահոգությունը հայտնենք տարկետման իրավունքի սահմանափակման հետ։ Ցավոք սրտի, մենք դեռ չենք լսել ձեր կարծիքը։ Մենք կմնանք կառավարության շենքի մոտ այնքան ժամանակ, մինչև չստանանք որևէ պատասխան», – ասաց Դավիթ Պետրոսյանը։
Նոր օրինագծով առաջարկվում է պարտադիր զինվորական ծառայության զորակոչից ուսումնառության նպատակով տարկետում տրամադրել միայն այն դեպքում, եթե Հայաստանում հավատարմագրված բարձրագույն ուսումնական հաստատություններում բակալավրի, կամ դիպլոմավորված մասնագետի, կամ ինտեգրված կրթական ծրագրով սովորող քաղաքացին պաշտպանության նախարարության հետ կնքում է քաղաքացիաիրավական բնույթի պայմանագիր՝ ուսումնառության ընթացքում ռազմական պատրաստություն անցնելու և ուսումնառության ավարտից հետո պաշտպանության նախարարության կողմից նշված վայրում և պայմաններում զինվորական ծառայություն անցնելու մասին, սակայն այս պարագայում այդ ուսանողները 2-ի փոխարեն կծառայեն 3 տարի ժամկետով։ –0–
