ԵՐԵՎԱՆ, 24 ապրիլի. /Նովոստի-Արմենիա/. ԱՄՆ նախագահ Դոնալդ Թրամփն ապրիլի 24-ի ողբերգական իրադարձություններին նվիրված իր ելույթում չօգտագործեց «ցեղասպանություն» եզրը:
«Այսօր մենք հիշում և ոգեկոչում ենք նրանց հիշատակը, ովքեր տուժել են «Մեծ Եղեռնի» ՝ 20-րդ դարի ամենազանգվածային վայրագությունների ժամանակ: Սկսած 1915 թվականից՝ մեկուկես միլիոն հայ տեղահանվեց, սպանվեց կամ մահվան դատապարտվեց Օսմանյան կայսրության գոյության վերջին տարիներին»,- ասվում է պետության երկրի՝ Սպիտակ տան մամուլի ծառայության տարածած հաղորդագրությունում:
Թրամփը նշել է, որ միանում է Ամերիկայի հայկական համայնքին և աշխարհասփյուռ հայությանը՝ սգալով անմեղ մարդկանց մահը:
«Մտորելով մարդկության պատմության այդ մռայլ գլխի մասին՝ մենք նաև ընդունում ենք հայ ժողովրդի տոկունությունը: Նրանցից շատերը նոր կյանք են կերտել Միացյալ Նահանգներում և մեծ ավանդ են ներդրել մեր երկրի զարգացման գործում՝ միևնույն ժամանակ պահպանելով պատմական հայրենիքի հիշողությունները, որտեղ նրանց նախնիները հիմնել են հնագույն հզոր քաղաքակրթություններից մեկը»,- ասվում է Թրամփի խոսքում:
«Մենք պետք է հիշենք վայրագությունները, որպեսզի թույլ չտանք դրանց կրկնությունը: Մենք ողջունում ենք ցավալի անցյալի փաստերն ընդունելու ու դրանց հետ հաշվի նստելու ջանքերը, որ ձեռնարկվում են հայերի ու թուրքերի կողմից՝ որպես առավել արդարացի ու հանդուրժողական ապագայի համար հիմքեր նախապատրաստելու հույժ կարևոր քայլ»,- ասվում է ԱՄՆ նախագահի խոսքում:
Ամերիկացի նախագահի ուղերձին ի պատասխան՝ Ամերիկայի հայ ազգային կոմիտեի գործադիր տնօրեն Արամ Համբարյանը հայտարարել է, որ Թրամփի հայտարարությունը չի կարող պատշաճ կերպով բնութագրել Հայոց ցեղասպանությունը:
Նա նշել է, որ Թրամփը խուսափել է Ցեղասպանության փաստի հաստատումից իր հայտարարությունում: «Նախագահ Թրամփը նախընտրել է չդատապարտել և չհիշել Հայոց ցեղասպանությունը, այլ պահպանել Անկարայի սահմանած արգելքը՝ այն քննարկելու հարցում»,- ասել է Համբարյանը:
ANCA-ի ղեկավարի խոսքով, չկարողանալով պատշաճ կերպով հիշատակել ապրիլի 24-ը, նախագհ Թրամփը փաստորեն «ԱՄՆ-ի՝ ցեղասպանության կանխարգելման քաղաքականությունը փոխանցեց Ռեջեփ Թայիփ Էրդողանին՝ գոռոզ և ավտորիտար բռնապետին, ով ակնհայտ վայելում է այն, որ ամերիկացի նախագահները լռության են մատնում Թուրքիայում մեկուկես միլիոն հայերի, հույների, ասորիների և այլ քրիստոնյաների զանգվածային սպանությունները»: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
