ԵՐԵՎԱՆ, 20 մայիսի./Նովոստի–Արմենիա/. «Իմ քայլ» խմբակցության պատգամավոր Գևորգ Պապոյանը գրառում է կատարել Facebook–յան իր էջում` պարզաբանելով վաղը ուսանողների շրջանում դասադուլ կազմակերպելու կոչերը։
«Հարգելի հայրենակիցներ, քանի որ շահարկվում է իմ կողմից դասադուլի առաջարկը, ապա նշեմ, որ սա բացառապես իմ դիրքորոշում էր, ոչ թե քաղաքական թիմինը, սակայն նշեմ, որ այնուամենայնիվ ամեն մի ուսանող անկախ է և ինքն է որոշում անել դասադուլ կամ մասնակցել որևէ ակցիայի, թե ոչ։ Իսկ ես վաղվա ակցիային մասնակցելու եմ որպես պատգամավոր, որպեսզի հանդիպեմ իմ ընտրողներին, թույլ չտամ սադրանքներ և բռնություն։ Ամեն ինչ պետք է լինի սիրո, հանդուրժողականության և օրինականության մթնոլորտում», –նշել է Պապոյանը։
Նա նաև կոչով դիմել է ուսանողներին. «Հարգելի ուսանողներ, քանի որ շահարկվում է իմ խոսքը, հայտարարում եմ, որ ԲՈՒՀ-երը ապաքաղաքական մարմին են և իմ կողմից վաղվա դասին չմասնակցությունը պայմանավորված է ԱԺ պատգամավորի գործառույթների իրականացմամբ, այն է հանդիպել քաղաքացիներին, ինչպես նաև հանդարտության և զսպվածության կոչ անել խաղաղ ակցիայի մասնակիցներին, որպեսզի չլինեն սադրանքներ։ Իսկ ինչ վերաբերվում է ձեզանից յուրաքանչյուրի՝ ակցիայի մասնակցելուն կամ չմասնակցելուն, ապա դա յուրաքանչյուր քաղաքացու որոշումն է։ Ներողություն եմ խնդրում վաղվա դասին չմասնակցելու համար, բացակա դասը անպայման լրացվելու է», – գրել է Գևորգ Պապոյանը։–0–