ԵՐԵՎԱՆ, 16 օգոստոսի. /Նովոստի-Արմենիա/. Հայաստանի նախկին նախագահ Ռոբերտ Քոչարյանն իր դեմ հարուցված գործն անվանեց արհեստական, իսկ իր փաստաբանների թիմը, նրա խոսքով, ջախջախեց մեղադրական կողմը`«չթողնելով քարը քարի վրա»:
Երևանի ընդհանուր իրավասության դատարանը հուլիսի 28-ի լույս գիշերը Ռոբերտ Քոչարյանին ձերբակալելու մասին որոշում է կայացրել մարտի մեկի գործի շրջանակում: Նա մեղադրվում է այլ անձանց հետ նախնական պայմանավորվածությամբ սահմանադրական կարգը տապալելու համար:
Загружается новость ...
"Право"
«Սա այն դեպքը չէր, երբ կարելի էր ասել, որ մեղադրանքի այս կամ այլ մասը թույլ է կամ ուժեղ: Բոլոր մեղադրանքները կառուցված էին կեղծ, շինծու, արհեստական ապացույցների և եզրակացությունների վրա: Չեմ կարող խոսել կոնկրետ գործի մասին, քանի որ գոյություն ունի քննչական գաղտնիք, և բազմաթիվ կետեր հրապարակելու իրավունք չկա»,- ասաց Քոչարյանը «Երկիր մեդիա» հեռուստաալիքին տված հարցազրույցում:
Նա հայտնեց, որ պաշտպանության կողմը պահանջում է, որ դատավարությունը լինի թափանցիկ, և գաղտնիքը հանվի:
«Հնարավորություն տվեք պաշտպանվող կողմին հրապարակայնորեն խոսել գործի հետ կապված ամեն ինչի մասին: Կտեսնեք, որ ամբողջ գործն արհեստական է, սա դասական քաղաքական հետապնդման մոդել է»,- ասաց նա:
Նախկին նախագահը չբացառեց, որ կարող է կրկին ձերբակալվել, բայց միաժամանակ նշեց, որ ներկայիս տեսքով գործը որևէ հնարավորություն չունի շահելու Մարդու իրավունքների եվրոպական դատարանում:
«Կատարվողը մեր դատական համակարգի համար լուրջ թեստ է: Մեր համակարգը սկսում է առաջնորդվել սոցցանցային տրամադրություններով»,- ասաց Քոչարյանը:
Ինչ վերաբերում է Հատուկ քննչական ծառայության ղեկավար Սասուն Խաչատրյանի հայտարարություններին, ապա նա նշեց, որ վերջինս թույլ է տալիս բաներ, որոնք հակասում են օրենքին:
«Տվյալ դեպքում նա իրեն օրենք է համարում և կարծում է, թե օրենքից բարձր է: Կարծում եմ` սա խնդիր է»,- ասաց պաշտոնաթող նախագահը: -0-
