ԵՐԵՎԱՆ, 13 մարտի./Նովոստի–Արմենիա/. Երևանի ընդհանուր իրավասության դատարանը չորեքշաբթի հետաձգեց ՀՀ երկրորդ նախագահ Ռոբերտ Քոչարյանի կալանավորումը 2 ամսով երկարացնելու միջնորդության քննությունը: Միջնորդությունը կքննվի հինգշաբթի ժամը 10.00–ին։ Այս մասին նիստից հետո լրագրողների հետ զրույցում ասաց Քոչարյանի պաշտպաններից Հայկ Ալումյանը։
Հիշեցնենք, որ Հատուկ քննչական ծառայությունը միջնորդել է ևս 2 ամսով երկարացնել 2–րդ նախագահի կալանավորման ժամկետը։ Միջնորդությունը քննում է դատավոր Արմեն Բեկթաշյանը։
Загружается новость ... "Лево"
Ներկայում Հայաստանի երկրորդ նախագահ Ռոբերտ Քոչարյանը մարտի 1-ի գործի շրջանակում մեղադրվում է սահմանադրական կարգը տապալելու համար: Նա գտնվում է կալանքի տակ: Փետրվարի 12-ին Հատուկ քննչական ծառայությունը Քոչարյանին նոր մեղադրանքներ է առաջադրել «Առանձնապես խոշոր չափերի կաշառք ստանալը» հոդվածով:
«Այսօր քննիչը ներկայացրեց իր միջնորդությունը, որից հետո դատախազները նույնպես իրենց դիրքորոշումը հայտնեցին, բնականաբար, միացան քննիչի միջնորդությանը։ Նախաքննական մարմինը նույն փաստարկներն է ներկայացրել, վաղն արդեն մեր դիրքորոշումն ու փաստարկները կներկայացնենք»,– ասաց Հայկ Ալումյանը։
Հայկ Ալումյանը հայտնեց, որ այսօրվա նիստին Ռոբերտ Քոչարյանը չի մասնակցել, քանի որ նպատակահարմար չի համարել։
ՀՀ երկրորդ նախագահ Ռոբերտ Քոչարյանը մեղադրվում է այլ անձանց հետ նախնական համաձայնությամբ սահմանադրական կարգը տապալելու մեջ։ Որպես մեղադրյալներ ներգրավված են նաև ՀԱՊԿ գլխավոր քարտուղար Յուրի Խաչատուրովը, ով ազատ էր արձակվել 5մլն դրամ գրավի դիմաց և ՀՀ պաշտպանության նախկին նախարարներ Միքայել Հարությունյանն ու Սեյրան Օհանյանը։ Փետրվարի 7–ին Վերաքննիչ դատարանը մերժեց ՀՀ նախկին նախագահ Ռոբերտ Քոչարյանի փաստաբանների բողոքը կալանքի ժամկետը երկարաձգելու վերաբերյալ։ -0-
