ԵՐԵՎԱՆ, 14 սեպտեմբերի. /Նովոստի–Արմենիա/. Հայաստանի կառավարությունն ուրբաթ նիստում որոշում կայացրեց «Ռազմավարական նախաձեռնությունների կենտրոն» հիմնադրամի լուծարման մասին։
Հիմնադրամը ստեղծվել էր նախկին վարչապետ Կարեն Կարապետյանի նախաձեռնությամբ, իսկ կառույցին ֆինանսական աջակցություն էր ցուցաբերում, մասնավորապես, ռուսաստանաբնակ գործարար և մեկենաս Ռուբեն Վարդանյանը։
Կառավարության որոշման համաձայն, լուծարման ընթացակարգերի իրագործմանը հատկացվել է 33.29 մլն դրամ ($68,6 հազ)։
«Միջոցները կուղղվեն կառույցի լուծարման ընթացակարգերի կազմակերպմանը, աշխատավարձերի և այլ վճարումների իրականացմանը, այդ թվում` աշխատանքային պայմանագրերի վաղաժամ լուծարման համար»,– ասվում է որոշման մեջ։
Ռազմավարական նախաձեռնությունների կենտրոնի հետ կապված հարցը բարձրացվել էր դեռևս սեպտեմբերի 8–ին Մոսկվայում։ Այդ օրը գործարարների հետ հանդիպման ժամանակ Հայաստանի վարչապետ Նիկոլ Փաշինյանը, ով նաև ըստ կարգավիճակի` հիմնադրամի Հոգաբարձուների խորհրդի նախագահն է, ասաց, որ կազմակերպության ողջ գործունեության ընթացքում չի իրականացվել ոչ մի նախագիծ։
Դրան ի պատասխան Ռուբեն Վարդանյանն ասել է, որ Հայաստանի իշխանություններից նամակ է ստացվել Կենտրոնի փակման մասին։ Այդ կապակցությամբ նա նշեց, որ ընկերների հետ համատեղ վերջին 18 տարիների ընթացքում Հայաստանում ներդրել է ավելի քան 600 մլն դոլար և կարևորեց «երկխոսության ռեժիմի պահպանումը և միմյանց լսելը»։
Загружается новость ...
"Право"
«Դուք իրավունք ունեք անելու ամենը, ինչ կապված է ձեր (պետական) կազմակերպությունների հետ, բայց եթե դա ստեղծվել է մասնավոր հատվածի հետ համատեղ, իսկ դուք նույնիսկ չեք հարցնում, այլ իրազեկում եք, որ պետք է փակեք, դա այդքան էլ հարգալից չէ»,– ասաց նա։
Սակայն ինչպես ավելի վաղ նշել էր Ռազմավարական նախաձեռնությունների կենտրոնի գործադիր տնօրեն Ալեքսանդր Խաչատուրյանը, Կենտրոնը Հայաստանում սկսել է գործել 2017 թվականի հունվարի 12–ից, և դրա գործունեության արդյունքն այդ ժամանակահատվածում դարձել են 26 նախագծեր, որոնց իրագործումը զուգահեռ էր կենտրոնի կայացմանը։ Խաչատուրյանը միաժամանակ ընդգծել է, որ խոսքը երկարաժամկետ հեռանկար ունեցող ռազմավարական նախագծերի մասին է։
Նրա խոսքով, կառույցն աշխատել է նաև հարկային և մաքսային վարչարարության ոլորտի բարեփոխումներին ուղղված ծրագրերի իրագործման ուղղությամբ։
Խաչատուրյանն ավելացրել է, որ Կենտրոնը գրեթե չի ծախսել պետական միջոցներ` բացառությամբ իր աշխատավարձի, որը չի կազմում 6 մլն դրամ, ինչպես պնդում էր Փաշինյանը։ Նա նշել է նաև, որ հրաժարվել է պետական մեքենայից, իսկ Կենտրոնի տարածքի վարձակալությունն իրականացվել է մասնավոր միջոցներով։ Ինչ վերաբերում է աշխատողների աշխատավարձերին, ապա թիմի հիմնական մասն աշխատավարձ էր ստանում դրամաշնորհային միջոցներից։ -0-