ԵՐԵՎԱՆ, 15 նոյեմբերի. /Նովոստի–Արմենրիա/. ՀՀ Վճռաբեկ դատարանը հինգշաբթի նիստ է անցկացրել Հայաստանի երկրորդ նախագահ Ռոբերտ Քոչարյանի կալանքի հարցով։
Վճռաբեկ դատարանը որոշում կայացրեց մասնակիորեն բավարարել ՀՀ գլխավոր դատախազ Արթուր Դավթյանի վճռաբեկ բողոքը և մերժել Քոչարյանի պաշտպանների բողոքը:
Որոշում կայացվեց գործն ուղարկել ՀՀ վերաքննիչ դատարան՝ նոր քննության:
Դատարանը քննել է սահմանադրական կարգը տապալելու մեջ մեղադրվող Ռոբերտ Քոչարյանի պաշտպանների և գլխավոր դատախազ Արթուր Դավթյանի վճռաբեկ բողոքները:
Որոշման հրապարակման պահին Ռոբերտ Քոչարյանը դատարանի դահլիճում չէր:
«Այսօր այստեղ քննարկվել է, թե առաջին ատյանը և վերաքննիչ դատարանը տարբեր որոշումներ են կայացրել, այդ դատարաններից ո՞րն էր ավելի ճիշտ»,– ասաց Ռոբերտ Քոչարյանի փաստաբան Հայկ Ալումյանը՝ նախքան որոշման հրապարակումը, ավելացնելով, որ հարցը բավականին մանրակրկիտ է քննարկվել։
Միաժամանակ, գործով հատուկ կարծիք արտահայտեց Վճռաբեկ դատարանի անդամ Սերժիկ Ավետիսյանը, ով կարծում է, որ բոլոր բողոքները պետք է դադարեցնել և դիմել Սահմանադրական դատարան որոշ դրույթների սահմանադրականությունը ստուգելու համար։
Ալումյանն այս կարծիքի վերաբերյալ նշում է, որ այն վերաբերում է կիրառված նորմերի սահմանադրականությանը։ Առաջարկվում է դադարեցնել դատավարությունը մինչև ՍԴ–ի` նախկին նախագահի անձեռնմխելիության հարցով որոշմանը, քանի որ այդ հարցերը չեն կարգավորվում առկա օրենսդրությամբ։
Հիշեցնենք, որ Հայաստանի երկրորդ նախագահ Ռոբերտ Քոչարյանը մեղադրվում է նախնական պայմանավորվածությամբ մի խումբ անձանց հետ սահմանադրական կարգը տապալելու մեջ։ -0-